မြန်မာပြည်ရဲ့ပထမဆုံး ပြည်လုံးကျွတ်ဆန္ဒခံယူပွဲ ဥပဒေမူကြမ်းကို နိုဝင်ဘာ ၂၀ ရက်က ကျင်းပတဲ့ ပြည်သူ့လွှတ်တော်မှာ ဥပဒေကြမ်းကော်မတီက တင်သွင်းလိုက်ပါတယ်။
ပြည်သူ့လွှတ်တော်ဥပဒေကြမ်းကော်မတီ အတွင်းရေးမှူး ဦးစောလှထွန်းက တင်သွင်းလိုက်တာ ဖြစ်ပြီး၂၀၀၈ ဖွဲ့စည်းပုံပြင်ဆင်ရာမှာ လွှတ်တော်အဆင့်မှာတင် ပြင်ဆင်လို့ရတဲ့အပိုင်းနဲ့ ပြည်လုံးကျွတ်ဆန္ဒ ခံယူပွဲလုပ်ပြီးမှ ပြင်ဆင်လို့ရတဲ့အပိုင်းဆိုပြီး နှစ်ပိုင်းရှိရာမှာ ဆန္ဒခံယူပွဲ လုပ်ပြီးမှပြင်ရင် အဆင်သင့်ဖြစ်အောင် အခုဥပဒေကြမ်းကိုတင်တာလို့ ဦးစောလှထွန်းက ပြောပါတယ်။
“လောလောဆယ် ပြည်ထောင်စုလွှတ်တော်မှာ ဖွဲ့စည်းပုံပြင်ဖို့ ဆွေးနွေးနေကြတယ်လေ။ ပြည်ထောင်စုလွှတ်တော်က ဖွဲ့စည်းပုံပြင်ဖို့ ဆုံးဖြတ်မယ်ဆိုရင် ပုဒ်မ ၄၃၆(ခ)အရ ပြည်လုံးကျွတ် ဆန္ဒခံယူပွဲလုပ်မှာပေါ့။ အဲ့ဒီလို လုပ်ပြီဆိုရင် ဖွဲ့စည်းပုံအခြေခံဥပဒေပြင်ဆင်ရေး ပြည်လုံးကျွတ် ဆန္ဒခံယူပွဲလုပ်ဖို့ ကော်မရှင်တွေဖွဲ့ရမယ်။ မဲဆန္ဒတွေ ယူရမယ်။ ဒါတွေ ဘယ်လို ကျင်းပပြုလုပ် မယ်ဆိုတာကို ဥပဒေပြဌာန်းဖို့ တင်တာပါ။”
ဒီဥပဒေကြမ်းကို လွှတ်တော်နှစ်ရပ်မှာဆွေးနွေးပြီး ပြည်ထောင်စုလွှတ်တော်က အတည်ပြုမှာ ဖြစ်ပါတယ်။
ရန်ကုန်က တရားရုံးချုပ်ရှေ့နေကြီး ဦးကိုနီက မြန်မာပြည်မှာ အရင်က ကျင်းပခဲ့ဖူးတဲ့ ပြည်လုံးကျွတ် ဆန္ဒခံယူပွဲတွေမှာ ဥပဒေနဲ့ ကျင်းပပြုလုပ်ခဲ့တာမဟုတ်ဘဲ ကော်မရှင်ဖွဲ့ပြီး လုပ်ခဲ့တာလို့ ပြောပါတယ်။
“ပြည်လုံးကျွတ် ဆန္ဒခံယူပွဲလုပ်တာ ၂ ကြိမ် ရှိခဲ့ဖူးတယ်။ ၁၉၇၄ ဆိုရှယ်လစ်ဖွဲ့စည်းပုံ အခြေခံ ဥပဒေကို အတည်ပြုတာ၊ ပြည်လုံးကျွတ်ဆန္ဒခံယူပွဲလုပ်မယ်။ မဲရုံမှာ မဲပေးကြမယ်ဆိုပြီး မဲပုံး ထောင်ခိုင်းပြီး မဲပေးတာပါ။ အလားတူ ၂၀၀၈ ဖွဲ့စည်းပုံအခြေခံဥပဒေကို ဆန္ဒခံယူပွဲ လုပ်မယ်ဆိုတော့လည်း ကော်မရှင်ဖွဲ့ပြီးတော့ ကော်မရှင်ကနေ ညွှန်ကြားချက်တွေ လုပ်ထုံးလုပ်နည်းတွေ ထုတ်ပြန်ပြီးတော့မှ ဖွဲ့စည်းပုံအခြေခံဥပဒေကို အတည်ပြုချလိုက်တာပဲ။ လူထုဆန္ဒခံယူခြင်းဆိုင်ရာဥပဒေဆိုတာ မရှိခဲ့ဖူးဘူး။ အခု ဒီဟာကတော့ နဲနဲထူးဆန်းတယ်။ သူတို့ စနစ်တကျလုပ်ချင်လို့ တင်တာလည်း ဖြစ်နိုင်တာပေါ့လေ။ ရေးထားတဲ့စာသားတွေ မကြည့်ရသေးတဲ့ အခါကျတော့ စာသားအပေါ် ထင်မြင်ချက်ပေးလို့တော့ မရဘူးပေါ့။”
လတ်တလောကျင်းပနေတဲ့ ပြည်ထောင်စုလွှတ်တော်မှာ ၂၀၀၈ ဖွဲ့စည်းပုံပြင်ဆင်ရေး လွှတ်တော် ကိုယ်စားလှယ်တွေ ဆွေးနွေးနေကြပြီး နိုဝင်ဘာ ၂၅ ရက် နောက်ဆုံးထား ဆွေးနွေးကြမှာ ဖြစ်ပါတယ်။
ပြီးခဲ့တဲ့ ရက်ပိုင်းအတွင်းကပဲ လွှတ်တော်နာယက သူရဦးရွှေမန်းက နောင်နှစ် မေလမှာ ပြည်လုံးကျွတ်ဆန္ဒခံယူပွဲ လုပ်ဖို့ရှိတယ်လို့ သတင်းမီဒီယာတွေကို ထုတ်ပြောထားပြီး ရက်ပိုင်း အတွင်း ဒီဥပဒေကြမ်း တင်သွင်းလာတာလည်း ဖြစ်ပါတယ်။
