ကိုပါကြီးမိသားစု အပါအ၀င် နိုင်ငံရေးအကျဉ်းသားများကို ဦးဝင်းတင် ဖောင်ဒေးရှင်း ထောက်ပံ့
Email This Story :
ဟံသာဝတီ ဦးဝင်းတင် ဖောင်ဒေးရှင်းရဲ့ ၁၇ ကြိမ်မြောက် နိုင်ငံရေးအကျဉ်းသား ထောက်ပံ့ငွေ ပေးအပ်ပွဲမှာ ကိုပါကြီး မိသားစုအပါအ၀င် နိုင်ငံရေးအကျဉ်းသား ၂၇ ယောက်ကို ငွေကျပ် ၅၇ သိန်း ပေးအပ်လှူဒါန်းခဲ့ပါတယ်။
ရန်ကုန်မှာ ၂ လတကြိမ် ပုံမှန်ပြုလုပ်နေကျ ထောက်ပံ့ငွေပေးအပ်ပွဲ အခမ်းအနားမှာ အခုလို ထောက်ပံ့ကူညီခဲ့တာဖြစ်တယ်လို့ ဖောင်ဒေးရှင်းအတွင်းရေးမှူး ဦးအောင်ကျော်က ပြောပါတယ်။
ဓာတ်ပုံ – Han Pa
“ဖမ်းဆီးသတ်ဖြတ်ခံရတဲ့ နိုင်ငံရေးအကျဉ်းသားလည်းဖြစ် စာနယ်ဇင်သမားလည်းဖြစ်တဲ့ ကိုပါကြီး မိသားစုကို ဦးစားပေးပြီး ပေးတယ်။ နောက်တခါ လက်ရှိ နိုင်ငံရေးအကျဉ်းသား ၆ ယောက်၊ မိကျောင်းကန်သပိတ်ခေါင်းဆောင် ဦးစိန်သန်းနဲ့ ဘိုင်မွန်းတည့်နေဂျာနယ်က ၅ယောက်ပေါ့။ နောက် နိုင်ငံရေးအကျဉ်းသားဟောင်း ၂၀ နဲ့ စုစုပေါင်း ၂၇ယောက်ကို ထောက်ပံ့ငွေကျပ် ၅၇ သိန်း ပေးအပ်ခဲ့ပါတယ်။”
ဟံသာဝတီဦးဝင်းတင် ဖောင်ဒေးရှင်းအနေနဲ့ အခု ၁၇ ကြိမ်မြောက် ထောက်ပံ့ငွေပေးအပ်ခဲ့ပြီး ချိန်အထိ နိုင်ငံရေးအကျဉ်းသားနဲ့ အကျဉ်းသားဟောင်းပေါင်း ၅၆၀ ကျော်ကို ငွေကျပ်သိန်း ၁၄၀၀ ကျော် ထောက်ပံ့ပေးအပ်ခဲ့ပြီး ဖြစ်ပါတယ်။
ဒါ့အပြင် နိုင်ငံရေးအကျဉ်းသားဟောင်းများရဲ့ သားသမီးတွေကို ပညာရေးထောက်ပံ့ငွေကျပ် သိန်း ၈၀၀ ကျော် ပေးအပ်ကူညီခဲ့ပြီးလည်း ဖြစ်ပါတယ်။
ဦးဝင်းတင်ဆုံးတာ ၆ လပြည့်တဲ့ ပြီးခဲ့တဲ့လကစပြီး ကျန်းမာရေးကူညီစောင့်ရှောက်မှုပေးနိုင်ဖို့ ရန်ကုန်မြို့ လမ်း ၅၀ မှာ စေတနာအခမဲ့ဆေးခန်းတခုဖွင့်ပြီး အကျဉ်းသားဟောင်းတွေ၊ စာနယ်ဇင်းသမားတွေကို ကုသပေးနေပါတယ်။ ဖောင်ဒေးရှင်းရဲ့ ကျန်းမာရေးအသုံးစရိတ် ငွေကျပ် သိန်း ၁၀၀၀ ကျော် သုံးစွဲခဲ့ပြီးလည်း ဖြစ်ပါတယ်။
ဟံသာဝတီဦးဝင်းတင် ၈၂ နှစ်မြောက်မွေးနေ့ ၂၀၁၂ ခုနှစ်၊ မတ်လ ၁၂ ရက်ကစပြီး လက်ရှိနိုင်ငံရေး အကျဉ်းသားများ၊ နိုင်ငံရေး အကျဉ်းသားမိသားစုများနဲ့ ဘ၀တူ စာပေရေးဖော်ရေးဘက် စာနယ်ဇင်းသမားများကို ထောက်ပံ့ကူညီခဲ့တာ ဖြစ်ပါတယ်။
