ရှမ်းပြည်နယ်အစိုးရနဲ့ တနိုင်ငံလုံးဆိုင်ရာ ဗဟိုရှမ်းစာပေယဉ်ကျေးမှုအသင်းက ဦးဆောင်ပြီး ရှမ်းသက္ကရာဇ် ၂၀၁၉ နှစ်သစ်ကူးပွဲတော်ကို ပြည်နယ်မြို့တော် တောင်ကြီးမှာ ၇ ရက်တိုင် စည်ကားသိုက်မြိုက်စွာ ကျင်းပသွားမယ်လို့ ပွဲဖြစ်မြောက်ရေးကော်မတီက ကြေညာထား ပါတယ်။
နိုဝင်ဘာလ ၁၈ ရက်ကနေ ၂၄ ရက်နေ့ထိ ၇ ရက်တာကာလ အတွင်း ကောက်သစ်ဦး အလှူပွဲ၊ ကောက် သစ်စားပွဲ၊ ပျော်ပွဲ ရွှင်ပွဲတွေနဲ့အတူ ရှမ်းပြည်နယ်က မြို့ရွာသမိုင်း၊ လူမျိုး သမိုင်း နဲ့ ယဉ်ကျေးမှုဆိုင်ရာ စာတမ်းဖတ်ပွဲ၊ ရိုးရာဝတ်စား ဆင်ယင်မှုပြိုင်ပွဲ၊ မီးပုံးပျံပြိုင်ပွဲ၊ သစ်သီးအလှပန်း အလှပြိုင်ပွဲ၊ အားကစားပြိုင်ပွဲ၊ ယဉ်ကျေးမှုပြခန်း နဲ့ တိုယိုတာကားဆယ်စီး ကံစမ်းမဲ ဖောက်ပေးမယ်လို့ ကြေငြာထားချက်အရ သိရပါတယ်။
အရင်တုန်းက ရှမ်းနှစ်သစ်ကူးပွဲကို ကိုယ့်ဒေသနဲ့ကိုယ်ပဲ ကျင်းပခဲ့ပြီး ဦးသိန်းစိန်သမ္မတ လက်ထက် ငြိမ်းချမ်းရေး ဖော်ဆောင်လာတဲ့အခါမှာ ရှမ်းလူမှုအခြေပြုအဖွဲ့၊ နိုင်ငံရေးပါတီနဲ့ ရှမ်းလက်နက်ကိုင်အဖွဲ့တွေ ပေါင်းစည်းပြီး ဗဟိုအနေနဲ့ပါ ကျင်းပလာခဲ့တာမှာ မနှစ်က ရှမ်းပြည်နယ်အရှေ့ပိုင်း ကျိုင်းတုံမြို့မှာ ပထမဆုံးအကြိမ် ကျင်းပခဲ့ပြီး ဒီနှစ်မှာတော့ မြို့တော် တောင်ကြီးမှာ ဒုတိယအကြိမ် ကျင်းပတာဖြစ်ပါတယ်။
ရှမ်းသက္ကရာဇ်ကို ရှေးခေတ် ရှမ်းမင်းများလက်ထက် မောပြည်ထောင် တည်ထောင်တဲ့ သာသနာတော်နှစ် ၄၅၀ နတ်တော်လဆန်း ၁ ရက်နေ့ နဲ့ ရှမ်းနယ်ပယ်ထဲကို ဗုဒ္ဓဘုရားရှင် ပိဋကတ်သုံးပုံ စတင် ပင့်ဆောင်လာခဲ့တဲ့ နေ့အထိမ်းအမှတ်အဖြစ် စတင်ရေတွက် သတ်မှတ်ခဲ့တာ ဖြစ်ပါတယ်။
