လိပ်ကျွန်းအရေး ထိုင်း၊ မြန်မာ၊ ဗြိတိန် တွေ့ဆုံမည်

ထိုင်းနိုင်ငံတောင်ပိုင်း စူရတ်ဌာနီခရိုင် လိပ်ကျွန်းမှာ ဗြိတိန်နှစ်ဦး သတ်ဖြတ်ခံရမှုနဲ့ ပတ်သက်လို့ မြန်မာ၊ ထိုင်း၊ ဗြိတိန်နိုင်ငံက တာဝန်ရှိသူတွေဟာ ထိုင်းနိုင်ငံဘန်ကောက်မှာ ပထမဆုံးအကြိမ်  အောက်တိုဘာ ၁၄ ရက်နေ့ မနက် သုံးဖွဲ့စုံညီ တွေ့ဆုံကြမှာဖြစ်ပါတယ်။ ဒီတွေ့ဆုံပွဲနဲ့ ပတ်သက်လို့ သမ္မတရုံး ညွှန်ကြားရေးမှူး ဦးဇော်ဌေးက မြန်မာသံရုံးနဲ့ ဗြိတိန်သံရုံးက တာဝန်ရှိသူတွေ တွေ့ဆုံခဲ့ပြီးတဲ့နောက် သုံးနိုင်ငံ တာဝန်ရှိသူတွေ တွေ့ဆုံကြမယ်လို့ ပြောပါတယ်။ “အဓိကကဗျာ၊ သေတာက ဗြိတိန်၊ ကျူးလွန်တယ်လို့ သံသယရှိတာက မြန်မာ၊ ဖြစ်တာက ထိုင်းမှာဖြစ်တယ်။ အဲဒီတော့ သုံးနိုင်ငံ ပါဝင်ပတ်သက်နေတဲ့ကိစ္စမှာ မျှတတဲ့၊ ထိုင်းရဲကလည်း သူတို့ဘက်က အာမခံထားတယ် သူတို့ရဲ့ စုံစမ်းစစ်ဆေးမှု၊ ဒါကိုလည်း ကျနော်တို့ သက်ဆိုင်ရာ နိုင်ငံအစိုးရတွေရဲ့ကိုယ်စား သံရုံးတွေကို ရှင်းပြမှာပေါ့နော်၊ ဒါမျိုးဖြစ်လိမ့်မယ်။ ပြီးတော့မှ ဒီဟာနဲ့ပတ်သက်ပြီးတော့ ပွင့်ပွင့်လင်းလင်း စုံစမ်းစစ်ဆေး ဖော်ထုတ်နိုင်ဖို့အတွက်၊ အပြစ်ရှိရင်လည်း အပြစ်ရှိတဲ့အလျောက်ပေါ့နော်။ ရသင့်ရထိုက်တဲ့ အခွင့်အရေးတွေရဖို့ပေါ့ ဒါမျိုးတွေ ညှိကြနှိုင်းကြဖို့ပါ။ “အထူးသဖြင့်တော့ ထိုင်းနိုင်ငံရဲ့ စုံစမ်းစစ်ဆေးမှုနဲ့ပတ်သက်ပြီးတော့ ကျနော်တို့ ဘာမှ ဝေဖန်ချက် မပေးလိုဘူးပေါ့နော်။ သို့သော်လည်းပဲ သူ့နိုင်ငံသား၊ ကိုယ့်နိုင်ငံသား ပါဝင်ပတ်သက်တဲ့ကိစ္စကို ကျနော်တို့က မျှော်လင့်တာပေါ့။ သုံးဦးသုံးဖလှယ်တွေ့ပြီးသွားပြီဆိုရင် ကျူးလွန်တဲ့ သူတွေကို ဥပဒေနဲ့အညီ အရေးယူနိုင်ဖို့ ပြစ်မှုကျူးလွန်ခြင်းမရှိဘူးဆိုရင်လည်း မှားယွင်းအရေးယူပေးခြင်းမရှိစေဖို့၊ အဲဒါနဲ့ပတ်သက်ပြီး မျှမျှတတ မှန်မှန်ကန်ကန် ဖြေရှင်းဆောင်ရွက်မယ့် နည်းလမ်းတွေပေါ့။ “အထူးသဖြင့်ပေါ့ သုံးနိုင်အကြား နားလည်မှု၊ ယုံကြည်မှုတွေ မပျောက်ပျက်ဘဲနဲ့ ပူးပေါင်းဆောင်ရွက်နိုင်မယ့် လမ်းကြောင်းတွေ ဘယ်လိုရမလဲဆိုတာ အဲဒါ ဆွေးနွေးနိုင်မယ်လို့ မျှော်လင့်တယ်၊ ကျနော်တို့ဘက်ကတော့” လို့ ပြောပါတယ်။ စက်တင်ဘာ ၁၅ ရက်နေ့က အသက်နှစ်ဆယ်ကျော် ဗြိတိသျှလူမျိုး လူငယ်အမျိုးသမီး ၁ ဦးနဲ့ အမျိုးသား ၁ ဦး ခိုတောင် ကျွန်းကမ်းစပ်မှာ သတ်ဖြတ်ခံခဲ့ရမှုနဲ့ပတ်သက်ပြီး မြန်မာလူငယ် ၂ ဦး စွပ်စွဲဖမ်းဆီးခံနေရတာပါ။

More News
Up