မြန်မာ့စီးပွားရေးဘဏ် နိုင်ငံခြားငွေလုပ်ငန်းဌာန ရန်ကုန်တွင် ပြန်ဖွင့်
DVB
·
September 29, 2014
၂၀၀၈ ခုနှစ်က နေပြည်တော် ကို ပြောင်းရွှေ့သွားတဲ့ မြန်မာ့စီးပွားရေး ဘဏ်ရဲ့ နိုင်ငံခြား ငွေလုပ်ငန်းဌာနဟာ ပြောင်းလဲလာတဲ့ စီးပွားရေးအခြေအနေနဲ့ ကိုက်ညီဖို့အတွက် ရန်ကုန်မြို့မှာ ပြန်လည် ဖွင့်လှစ်လိုက်ပြီ ဖြစ်ကြောင်း မြန်မာ့သတင်းစဉ်က ထုတ်ပြန်ကြေညာပါတယ်။
ဆူးလေဘုရားလမ်းနဲ့ ကုန်သည်လမ်းထောင့်မှာ ဖွင့်လှစ်ထား တဲ့ မြန်မာ့စီးပွားရေးဘဏ် အဆောက်အဦမှာ ဖွင့်လှစ်လိုက် တာ ဖြစ်ပြီး ပြည်တွင်း နဲ့ ပြည်ပငွေကြေး ၀န်ဆောင်မှု လုပ်ငန်း တွေ လုပ်ကိုင်ပေးနိုင်တော့ မယ်လို့ ဆိုပါတယ်။
မြန်မာ့စီးပွားရေးဘဏ် နိုင်ငံခြားငွေလုပ်ငန်းဌာနဟာ နိုင်ငံခြားငွေစာရင်းရှင် ဖွင့်လှစ်တာ၊ နိုင်ငံခြားငွေတွေကို ပြည်တွင်းမှာ စာရင်းတခုကနေ တခု လွှဲပြောင်းပေးတာ၊ ပြည်ပကို ငွေလွှဲပို့တာ၊ ပြည်ပက လွှဲလာရင် လက်ခံပေးတာနဲ့ နိုင်ငံခြားရင်းနှီးမြှုပ်နှံမှုဆိုင်ရာ ငွေကြေး လွှဲပြောင်းမှုတွေကို ဆောင်ရွက်ပေးနိုင်တယ် လို့ဆိုပါတယ်။
မြန်မာ့စီးပွားရေးဘဏ် နိုင်ငံခြားငွေလုပ်ငန်းဌာနကို ၁၉၉၆ ခုနှစ်က အခု တည်ရှိနေတဲ့ ကုန်သည်လမ်းထောင့်မှာ စတင် ဖွင့်လှစ်ခဲ့ပြီး ၂၀၀၈ ခုနှစ်မှာ နေပြည်တော်ကို ပြောင်းရွှေ့ သွားခဲ့တာ ဖြစ်ပါတယ်။