တရုတ်နိုင်ငံ ဟိုင်နန်ကျွန်းကို တိုက်ဖုန်းမုန်တိုင်း ၀င်ရောက်

တရုတ်နိုင်ငံတောင်ပိုင်း ဟိုင်နန်ကျွန်းကို ဒီနေ့ မနက်ပိုင်းက တိုင်ဖုန်မုန်တိုင်း Kalmaegi ၀င်ရောက်နေတာကြောင့် မိုးသက်လေပြင်းတွေ ကျရောက် နေပါတယ်။ _77610072_023918889-1လေတိုက်နှုန်း တစက္ကန့်ကို မီတာ ၄၀ ရှိတယ်လို့ တရုတ်အမျိုးသား မိုးလေ၀သဌာန က ကြေညာပါတယ်။ ဒါကြောင့် လမ်းဘေး billboard ဆိုင်းဘုတ်ကြီးတွေ၊ သစ်ပင်တွေ၊ ယာဉ်ငယ်တွေနဲ့ လမ်းဘေးဆိုင်တွေ အကုန်လဲပြိုခဲ့ပါတယ်။ မြေအနိမ့်ပိုင်းနေ ဒေသခံတွေကို ဘေးကင်းရာကို ဟိုင်နန်ပြည်နယ်အစိုးရက ပြောင်းရွှေ့ပေးနေပါတယ်။ မိုးလေ၀သဌာန၀န်ထမ်းတွေက လွဲလို့ နိုင်ငံဝန်ထမ်းတွေနဲ့ ကျောင်းသားတွေကို အိမ်မှာပဲ နေဖို့ ဟိုင်နန်ပြည်နယ်အစိုးရက ညွှန်ကြားထားပါတယ်။ တောင်တရုတ်လေကြောင်းလိုင်းဟာလည်း စက်တင်ဘာ ၁၅ ရက်နေ့က လေယာဉ်ခရီးစဉ် ၈ ခုကို ဖျက်သိမ်းခဲ့ပြီး ၁၆ ရက်နေ့မှာတော့ ခရီးစဉ်အ၀င်အထွက်အားလုံးကို ဖျက်သိမ်းထားပါတယ်။ ကမ်းနီးနဲ့ ကမ်းဝေးရေယာဉ်တွေနဲ့ ကမ်းလွန်ရေနံတူးလုပ်သားတွေအားလုံးကိုလည်း မုန်တိုင်း မတိုင်ခင်ကတည်းက ကယ်တင်ခဲ့ပြီး ဖြစ်ပါတယ်။ Kalmaegi မုန်တိုင်း စက်တင်ဘာ ၁၄ ရက်နေ့ကက ဖိလစ်ပိုင်နိုင်ငံကို ၀င်ရောက်ခဲ့ပြီး ဟောင်ကောင်ကျွန်းကိုတော့ စက်တင်ဘာ ၁၆ ရက်နေ့ အစောပိုင်းက ၀င်ရောက်ခဲ့ပါတယ်။ မိုးလေပြင်းထန်တာကြောင့် ဟောင်ကောင်စတော့ဈေးကွက်တွေကိုလည်း ဒီနေ့ ဖျက်သိမ်းခဲ့ရပါတယ်။

More News
Up