ထိုင်းတောင်ပိုင်း၊ ဆုန်ခလာခရိုင်၊ ဘန့်ကလမ်မြို့မှာ ပြီးခဲ့တဲ့အပတ်က သတ်ဖြတ်ပြီး အမှိုက်ပုံနား လာရောက်စွန့်ပစ်ခံထားရတဲ့ အမျိုးသား အလောင်း ၃ လောင်းမှာ မြန်မာလုပ်သားတွေဖြစ်ပြီး ပါဝင်ပတ်သက်သူ ၅ ဦး အဖမ်းခံထားရတယ်လို့ မတ် ၂၀ ရက်  ချနယ် ၇ ထိုင်းတီဗွီသတင်းမှာ ဖော်ပြပါတယ်။

ပြီးခဲ့တဲ့ မတ် ၁၅ ရက်မနက်က ဘန့်ကလန်မြို့ ထာ့ချန့်ရပ်ကွက်ရှိ တောစပ်အမှိုက်ပုံမှာ သေဆုံးနေတဲ့ အမျိုးသား ၃ ဦးတွေ့ရှိပြီး ၁ ဦးက ခြေလက်ကြိုးတုပ်ခံထားရပြီး လည်ပင်းမှာ ဓား ဒဏ်ရာရကာ ကျန် ၂ ဦးမှာလည်းအကြမ်းဖက်ခံရပြီး သေဆုံးခဲ့ပုံရတယ်လို့ တာဝန်ရှိသူတွေက ပြောပါတယ်။

သူတို့ပုံစံဟာ လူကုန်ကူးခံရတဲ့ပုံစံတွေဖြစ်နေလို့  စုံစမ်းစစ်ဆေးရေးရဲတပ်ဖွဲ့က  အရင်လူ ကုန်ကူးမှုမှာ ပါဝင်ပတ်သက်ဖူးသူတွေ၊ အမည်ပျက်စာရင်းထဲပါသူတွေ လိုက်စုံစမ်းပြီး သံသယရှိသူ ၅ ဦးကို ဖမ်းဆီးလိုက်တာ ဖြစ်ပါတယ်။

အဆိုပါ ၅ ဦးမှာ အမျိုးသား ၃ ဦး အမျိူးသမီး ၂ ဦးပါဝင်ပြီး စမွတ်ပရကန်နဲ့ ကော်ဖငန်းမြို့နယ်တွေမှာ အဖမ်းခံရကာ လူမျိုးနဲ့နိုင်ငံသားကိုတော့ သတင်းမှာ ဖော်ပြထားခြင်း မရှိပါဘူး။

အခင်းဖြစ်တဲ့နေ့က သူတို့ဟာ  မြန်မာလုပ်သားစုစုပေါင်း ၃၄ ဦးကို စမွတ်ပရကန်ခရိုင်ကနေ တင်ဆောင်ပြီး ထိုင်းတောင်ပိုင်း နာရာသီဝပ်ကို ပို့ပေးခဲ့တယ်လို့ ဝန်ခံပါတယ်။

ဆက်လက်စုံစမ်းချက်အရ ကျန်သူတွေဟာ မလေးရှားနိုင်ငံဘက်ကို ရောက်ရှိသွားပြီဖြစ်ပြီး ခြံလုပ်ငန်းနဲ့ ရာဘာခြစ်လုပ်ငန်းတွေမှာ သွားရောက်လုပ်ကိုင်နေတယ်လို့ ဆိုပါတယ်။ 

အဖမ်းခံရသူတွေက အဲဒီထဲက ၃ ယောက်ဟာ ကားပေါ်မှာ သူတို့ချင်းချင်း သတ်ဖြတ်ပြီးသေဆုံးသွားတာဖြစ်ပြီး သူတို့သတ်တာမဟုတ်ဘူးလို့  ငြင်းဆိုထားပါတယ်။  တာဝန်ရှိသူတွေကတော့ သူတို့ပြောတာကို မယုံကြည်ဘဲ လောလောဆယ် ပူးပေါင်းကြံရွယ် လူသတ်မှု ၊ အလောင်းဖျောက်ဖျက်မှုတွေနဲ့ ကနဦးအမှုဖွင့်ထားပါတယ်။

ထိုင်းတောင်ပိုင်းမှာ ဒီ ၂၀၂၃ ဇန်နဝါရီနဲ့ ဖေဖော်ဝါရီလအတွင်း တရားမဝင် ဝင်ရောက်လာသူတွေ  ဖမ်းဆီးရမိမှုပေါင်း ၂၉ မှုရှိပြီး တရားမဝင် ဝင်ရောက်သူ ၃၀၀ ကျော်နဲ့ ပွဲစား ၊ လမ်းပြ စုစုပေါင်း ၂၃ ယောက် ကိုဖမ်းဆီးရမိတယ်လို့ သတင်းမှာ ဖော်ပြပါတယ်။

REF: M.G.R