ထိုင်းအနောက်မြောက်ပိုင်း၊ ကန်ကျနပူရီခရိုင်ထဲမှာ တရားမဝင် ဝင်ရောက်လာတဲ့ မြန်မာနိုင်ငံသား အယောက် ၃၀ ကို လမ်းပြ ၁ ဦးနဲ့အတူ ဖမ်းဆီးရမိတယ်လို့ ကန်ကျနပူရီဒေသတွင်းသတင်းမှာ ဖော် ပြပါတယ်။
နယ်မြေထဲမှာ တရားမဝင် ဝင်ရောက်လာမယ့်သူတွေရှိကြောင်း ဒေသခံတွေရဲ့ သတင်းပေးချက်အရ နယ်ခြားစောင့်တပ် ၊ ရဲ နဲ့ ကျေးရွာလုံခြုံရေးအရံတပ်ဖွဲ့ဝင်တွေပါတဲ့ ပူးပေါင်းအဖွဲ့ဟာ လုံခြုံရေး စစ်ဆေးနေခဲ့ကြောင်းရာမှာ ဖေဖော်ဝါရီ ၂၃ ရက် မနက် ၇ နာရီလောက်မှာတော့ ဆိုင်းယို့ဒ်မြို့နယ် ဆိုင်းယို့ဒ်အုပ်စု နယ်မြေ ၂ ထာ့ထုန့်နားကျေးရွာအနီးမှာ လူတွေပြည့်ညှပ် တင်ဆောင်လာတဲ့ကား ၁ စီးကို ခေါ်ယူစစ်ဆေးရာက တရားမဝင် ဝင်လာသူတွေကို ဖမ်းမိတာလို့ တာဝန်ရှိသူက ပြောပါတယ်။
အဆိုပါဖြစ်စဉ်မှာ တရားမဝင် မြန်မာအမျိုးသား ၂၂ ယောက်နဲ့ အမျိုးသမီး ၈ ယောက် စုစုပေါင်း အယောက် ၃၀ နဲ့ ယာဉ်မောင်း(လမ်းပြ) အမျိုးသား တယောက်တို့ ဖမ်းမိခဲ့ပါတယ်။
စစ်ဆေးချက်အရ သူတို့တွေက မြန်မာနိုင်ငံ မော်လမြိုင်၊ ရန်ကုန်၊ ပဲခူးနဲ့ ရခိုင်ပြည်နယ်ကဖြစ်ပြီး ထိုင်းနိုင်ငံ စမွတ်စခွန်း ၊ လယောင်း ၊ ကန်ကျနပူရီ နဲ့ ဘန်ကောက်မှာ အလုပ်သွားလုပ်ဖို့ ပွဲစားကို ၁ ဦးလျှင် ဘတ် ၂၀၀၀၀ မှ ၃၀၀၀၀ ထိ ပေးခဲ့ရတယ်လို့ ပြောပါတယ် ။
တာဝန်ရှိသူတွေက သူတို့ကို ကိုဗစ်-၁၉ ကာကွယ်ရေးကိုယ်အပူချိန်တိုင်းတာပြီး လဝကဥပဒေနဲ့ အရေးယူဖို့ သက်ဆိုင်ရာနယ်မြေရဲစခန်းကို ပို့ဆောင်ထားတယ်လို့ သတင်းမှာ ဖော်ပြပါတယ်။
