အာဏာသိမ်း ၂ နှစ်ကျော်ကာလအတွင်း ကေအန်ယူ-ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေမှာ စစ်တပ်က လေကြောင်းတိုက်ခိုက်မှု အကြိမ်ရေ ၃၀၀ ကျော် ပြုလုပ်ခဲ့တာကြောင့် အပြစ်မဲ့အရပ်သားပြည်သူ ၃၆ ယောက် ထိခိုက်သေဆုံးခဲ့ပြီး ၅၇ ယောက် ထိခိုက်ဒဏ်ရာ ရရှိခဲ့တယ်လို့ ကေအန်ယူဗဟိုက ထုတ်ပြန်ပါတယ်။
ခုလိုတိုက်ခိုက်မှုဟာ ကော်သူးလေအုပ်ချုပ်နယ်မြေ ခရိုင် ၇ ခုထဲမှာ နေထိုင်တဲ့ အပြစ်မဲ့ အရပ်သားပြည်သူတွေကို ပစ်မှတ်ထားပြီး တိုက်ခိုက်ခဲ့တဲ့ လေကြောင်းတိုက်ခိုက်မှုတွေသာ ဖြစ်ပြီး တပ်ပိုင်းဆိုင်ရာကို တိုက်ခဲ့တဲ့ လေကြောင်းတိုက်ခိုက်မှုတွေကိုတော့ ထည့်သွင်း ရေတွက်ထားခြင်း မရှိသေးဘူးလို့ ဆိုပါတယ်။
ဒါ့အပြင် အဆိုပါ လေကြောင်းတိုက်ခိုက်မှုတွေအတွင်း အရပ်သားပြည်သူလူထုပိုင် နေအိမ် ၂၅၈ လုံး၊ စာသင်ကျောင်း ၁၂ ကျောင်း၊ ဆေးရုံ ၆ လုံး၊ ပြည်သူပိုင်အဆောက်အဦ ၃၅ လုံး၊ ဘုန်းကြီးကျောင်း ၄ ကျောင်း၊ သီလရှင်ကျောင်း ၁ ကျောင်း၊ ခရစ်ယာန်ဘုရားကျောင်း ၈ ကျောင်းတို့လည်း ထိခိုက်ပျက်စီးခဲ့ရတယ်လို့ ထုတ်ပြန်ချက်မှာ ဖော်ပြပါတယ်။
မြန်မာနိုင်ငံမှာတော့ အကြမ်းဖက်စစ်အုပ်စုက မတရားအာဏာသိမ်းယူထားခဲ့တဲ့ ကာလဟာ ၂ နှစ်ကျော် ကြာမြင့်လာခဲ့ပြီဖြစ်ကာ ဒီကာလတွေအတွင်း အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာ ဖြစ်ပါတယ်။
ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (OCHA) က နောက်ဆုံးထုတ်ပြန်ချက်မှာတော့ တိုက်ပွဲတွေ ပြင်းပြင်းထန်ထန် ဖြစ်ပွားနေတာကြောင့် ကရင်ပြည်နယ်အတွင်း လုံခြုံရေးနဲ့ လူသားချင်းစာနာမှုဆိုင်ရာ အခြေအနေတွေက စိုးရိမ်စရာ ဖြစ်နေပြီး ကျေးရွာ ၂၀ က လူဦးရေ ၁၇,၀၀၀ လောက်ဟာ နေရပ်စွန့်ခွာ တိမ်းရှောင်နေကြရတယ်လို့ ဆိုပါတယ်။
နိုင်ငံတဝန်းမှာတော့ ပြည်တွင်းနေရပ်စွန့်ခွာထွက်ပြေးရသူပေါင်း ၁ သန်းခွဲကျော် ရှိလာပြီဖြစ်ပြီး ဒီအထဲကမှ လူဦးရေ ၁ ဒသမ ၂ သန်းက ၂၀၂၁ ခုနှစ် ဖေဖော်ဝါရီလ အာဏာသိမ်းယူမှုအပြီး ဖြစ်ပေါ်လာတဲ့ ပဋိပက္ခနဲ့ မလုံခြုံမှုတွေကြောင့် နေရပ်စွန့်ခွာ ထွက်ပြေးကြရသူတွေလို့ ထုတ်ပြန်ထားပါတယ်။
