ရန်ကုန်တိုင်း၊ မြောက်ဥက္ကလာပမြို့နယ်၊ ဋ ရပ်ကွက်၊ ခေမာသီလမ်းနဲ့ ကန်သာယာပန်းခြံ တို့မှာ ‌မူးယစ်ဆေးဝါးရောင်းချသူ ၃ ဦးကို ဖေဖော်ဝါရီ ၁၂ ရက်က ဖမ်းဆီးရမိခဲ့တယ်လို့ CCDAC Myanmar က သတင်းထုတ်ပြန်ထားပါတယ်။

အဲဒီနေ့ ညနေ ၃ နာရီခွဲလောက်က အောင်မျိုးသန့် (၄၆ နှစ်) နဲ့ မခိုင်သဇင်ထွေး (၂၅ နှစ်) တို့က ကန်သာယာပန်းခြံအတွင်း လမ်းလျှောက်လာချိန်မှာ မူးယစ်ဆေးပြား ၅၀,၀၀၀၊ ဖုန်း ၂ လုံးနဲ့ စစ်ကောင်စီလက်အောက်ခံ မူးယစ်တပ်ဖွဲ့က ဖမ်းမိခဲ့ပြီး ညနေ ၃ နာရီ ၄၅ မိနစ်မှာ ချိုဝင်း (၄၁ နှစ်) ကို ‌ဋ ရပ်ကွက် ခေမာသီလမ်းမပေါ်မှာ ပါဂျဲရိုးကားနဲ့ ဖမ်းဆီးရမိခဲ့တယ်လို့ ဆိုပါတယ်။

အဆိုပါ ရပ်ကွက်နေသူတဦးက “ဖြစ်တာက ကန်သာယာပန်းခြံဆိုပေမဲ့ အပိုင်ရပ်ကွက်က ဋ နဲ့ ဇ တို့နဲ့လည်း ဆိုင်ပါတယ်။ ဇ ရပ်ကွက်၊ ဥဇ္ဇနာဘက်မှာလည်း ဆေးပြားရောင်းနေကြတာပဲ။ အသိပေးရင်တောင် ဘာမှလုပ်လို့မရဘူး၊ သက်သေမရှိဘူး‌လေ။ ပန်းခြံထဲ ညနေဆို လူငယ်လေးတွေ သုံးလေးယောက်နဲ့ ဖြန့်ခိုင်းနေကြတာ။ အခုဟာ နည်းနည်းများတယ် ဆိုပေမဲ့ နောက်ကွယ်မှာ ဒီထက်ကြီးတာတွေ ရှိနေနိုင်တယ်” လို့ ပြောပါတယ်။

မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေပုဒ်မတွေနဲ့ ကျား ၂ ဦး၊ မ ၁ ဦးကို မြောက်ဥက္ကလာပမြို့နယ်ရဲစခန်းမှာ အမှုဖွင့်ထားပြီး ဆက်စပ်တရားခံတွေ ဖမ်းဆီးရမိဖို့ စုံစမ်းနေတယ်လို့ သိရပါတယ်။