ပဲခူးတိုင်း၊ ညောင်လေးပင်မြို့၊ မြို့မ ၃ ရပ်ကွက်၊ ညောင်လေးပင်ဘူတာ၊ အမှတ် ၁ စင်္ကြံ ပလက်ဖောင်းပေါ်မှာ ဖေဖော်ဝါရီ ၁၃ ရက် နေ့လယ် ၁၂ နာရီ မိနစ် ၂၀ က ဗုံးပေါက်ကွဲမှု ဖြစ်ပွားခဲ့ပြီး လူ ၃ ဦးသေဆုံးကာ ၉ ဦး ထိခိုက်ဒဏ်ရာရရှိခဲ့တယ်လို့ မြို့ခံ လူမှုကူညီရေး အသင်းတွေဆီက သိရပါတယ်။
ခရီးသည်တွေ ရထားစောင့်ဆိုင်းနေချိန်မှာ အဆိုပါဗုံး စတင်ပေါက်ကွဲတာလို့ သိရပြီး ပေါက်ကွဲမှုကြောင့် ကျား ၁ ဦး၊ မ ၁ ဦး အခင်းဖြစ်နေရာမှာ သေဆုံးခဲ့ကာ ဒဏ်ရာရရှိသူတွေကို ဆေးရုံပို့ဆောင်နေတဲ့လမ်းမှာ မ ၁ ဦး ထပ်မံသေဆုံးသွားခဲ့တာပါ။
ညောင်လေးပင်အခြေစိုက် လူမှုကူညီရေးအသင်းက “၁၂ နာရီခွဲကျော်ကျော်လောက် အသင်းကို ဖုန်းဆက်အကူအညီတောင်းလို့ ကားနှစ်စီးနဲ့ သွားရောက်ကူညီခဲ့တာပါ။ ရောက်တော့ အားလုံး ၁၂ ယောက် ထိမှန်ထားတယ်။ အမျိုးသား ၁ ဦးနဲ့ အမျိုးသမီး ၁ ဦးက သွေးထွက်လွန်နေပြီး မမီတော့ဘူး။ တခြားအသင်းတွေနဲ့ ကျန်တဲ့လူတွေကို ကားပေါ်တင်ကြပြီး ဆေးရုံသွားကြတာ၊ လမ်းမှာ အမျိုးသမီး ၁ ဦး ထပ်ဆုံးသွားတယ်၊ ကျန် ၉ ဦးထဲက စိုးရိမ်ရတဲ့ ၃ ယောက်ကို ပဲခူးဆေးရုံပို့ထားပြီး ၆ ယောက်ကို ဒီညောင်လေးပင်မှာပဲ အတွင်းလူနာအဖြစ် ထားထားပါတယ်” လို့ ပြောပါတယ်။
သေဆုံးသွားသူ ၃ ဦးမှာ ကိုသက်နိုင်ထွန်း (၃၁ နှစ်)၊ မလဲ့လဲ့အေး (၃၆ နှစ်)၊ မနွဲ့နွဲ့ဝင်း (၄၂ နှစ်) တို့ဖြစ်ကြပြီး တောင်တွင်းကြီးမြို့ကနေ ညောင်လေးပင်မြို့မှာ အလုပ်လာရောက် လုပ်ကိုင်နေသူတွေလို့ သိရပါတယ်။
ဗုံးပေါက်ကွဲမှုအပြီး စစ်ကောင်စီခန့် ပဲခူးတိုင်းဝန်ကြီးချုပ်နဲ့ တိုင်းမှူးတို့ လာရောက်စစ်ဆေးခဲ့တယ်လို့ သိရပြီး ဒီဖောက်ခွဲမှုဖြစ်စဉ်ကို ဘယ်အဖွဲ့က လုပ်ဆောင်သလဲ ဆိုတာ သတင်းထုတ်ပြန်တာမျိုး မတွေ့ရသေးပါဘူး။
ဓာတ်ပုံ ( ရွှေရဲနွယ် လူမှုကူညီရေးအသင်း၊ Facebook၊ MRTV )
