စစ်ကိုင်းတိုင်း၊ ကန့်ဘလူမြို့နယ်၊ ကိုးတောင်ဘို့စျေးဟာ ဖေဖော်ဝါရီ ၉ ရက် မနေ့ညပိုင်းမှာ အကြမ်းဖက်စစ်ကောင်စီတပ်ကပစ်ခတ်တဲ့ လက်နက်ကြီးနဲ့ မီးကျည်တွေကျပြီး မီးလောင် ပျက်စီးသွားတယ်လို့ ဒေသခံ ကာကွယ်ရေးတပ်ဖွဲ့က ပြောပါတယ်။
မနေ့ညပိုင်းက ကိုးတောင်ဘို့ရွာမှာ အထိုင်ချတပ်စွဲထားတဲ့ စစ်ကောင်စီတပ်နဲ့ ဒေသခံကာကွယ်ရေးတပ်တွေ တိုက်ပွဲဖြစ်ခဲ့ပြီး စစ်တပ်က လက်နက်ကြီးတွေနဲ့ပစ်သလို အလင်းရောင်ရစေဖို့ လေယာဉ်အချက်ပြမီးကျည်တွေ တရစပ်ပစ်ခဲ့တာကြောင့် ဘူတာနားတဝိုက်နဲ့ ဈေးနားမှာ မီးလောင်ခဲ့တာလို့ ဒေသခံ Kotaungbo Revolution KTB-R က ထုတ်ပြန်ထားပါတယ်။
ဒါကြောင့် ဈေးတခုလုံးနီးပါး မီးလောင်သွားခဲ့ပြီး ပြည်သူတွေရဲ့ နေအိမ်တချို့လည်း မီးလောင် ပျက်စီးသွားတယ်လို့ သိရပါတယ်။
ဖေဖော်ဝါရီ ၆ ရက် မနက်ပိုင်းကလည်း ကိုးတောင်ဘို့ရွာကနေထွက်လာတဲ့ အကြမ်းဖက် စစ်သား အယောက် ၇၀ လောက်ကို ငှက်မွေးတောင်နားမှာ မိုင်းခွဲတိုက်ခိုက်တာကြောင့် အနည်းဆုံး ၇ ယောက် သေဆုံးပြီး တချို့ ဒဏ်ရာရခဲ့ပါတယ်။
သေဆုံး ဒဏ်ရာရသွားတဲ့ စစ်သားတွေကို ကိုးတောင်ဘို့ရွာကို ပြန်သယ်သွားပြီး ညနေဘက်မှာ သင်္ဂြိုဟ်တယ်လို့ ယူဆရကြောင်းလည်း Kotaungbo Revolution KTB-R က ဆိုပါတယ်။
