ရန်ကုန်တိုင်း၊ လှိုင်သာယာမြို့နယ်၊ မဟာမင်းခေါင်လမ်းရှိ စိန်ဂေဟာကုန်တိုက်ဘေးက တိုက်ခန်းတခုမှာ ဇန်နဝါရီ ၂၇ ရက် မနေ့ညက မီးလောင်မှုကြောင့် လူ ၆ ဦး လောက် ထိခိုက်ဒဏ်ရာရတယ်လို့ အနီးအနားနေ ဒေသခံတွေထံက သိရပါတယ်။
မနေ့ည ၇ နာရီ ၄၃ မိနစ်မှာ မီးစတင်လောင်ကျွမ်းခဲ့ရလို့ လှိုင်သာယာမီးသတ်စခန်းက ယာဉ်တွေနဲ့ မီးသတ်တပ်ဖွဲ့ဝင်တွေ ထွက်ခွာငြှိမ်းသတ်ခဲ့ရာမှာ ည ၈ နာရီ ၅၄ မိနစ်မှာ မီးထိန်းနိုင်ခဲ့ပြီး ည ၁၀ နာရီ ၂၃ မိနစ်မှာ မီးငြိမ်းသွားတယ်လို့ မြန်မာနိုင်ငံမီးသတ်တပ်ဖွဲ့ဌာနချုပ်က ထုတ်ပြန်ပါတယ်။
အဆိုပါ မီးလောင်မှုနဲ့ ပတ်သက်ပြီး အနီးနားရှိပြည်သူတစ်ဦးက “ ၆ ဦးထိတယ်။ ခုနကပဲ အရေးပေါ်ကားတွေနဲ့ သယ်သွားတယ်။ လောင်တာကတော့ five star ကြက်ကြော် အပေါ်ထပ်နားကစလောင်တာဖြစ်နိုင်တယ်။ ဘာကြောင့်လောင်တာလဲတော့မသိသေးဘူး”လို့ ပြောပါတယ်။
မီးလောင်ရတဲ့ အကြောင်းရင်းနဲ့ မီးလောင်မှုကြောင့် ထိခိုက်ပျက်စီး ဆုံးရှုံးမှုပမာဏကိုတော့ မသိရသေးပါဘူး။
ဓာတ်ပုံ -MFSD
