ပဲခူးတိုင်း၊ နတ်တလင်းမြို့နယ်မှာ ဇန်နဝါရီ ၂၆ ရက် လယ်ပိုင်းက စစ်ကောင်စီတပ်တွေကို PDF ပူးပေါင်းတပ်ဖွဲ့တွေက ကြားဖြတ်တိုက်ခိုက်ခဲ့လို့ စစ်ကောင်စီဘက်က ၄ ယောက်သေဆုံးကာ ၆ ယောက် အပြင်းအထန်ဒဏ်ရာရရှိသွားခဲ့တယ်လို့ ပဲခူးတိုင်း စစ်ဒေသခွဲ-Bago Region PDF က သတင်းထုတ်ပြန်ပါတယ်။

နတ်တလင်းမြို့နယ်၊ တောင်ညိုဆည်အထက်ပိုင်း ဘိုကြီးစခန်းကျေးရွာမှာ တပ်စွဲထားတဲ့ အကြမ်းဖက်စစ်ကောင်စီတပ်ဖွဲ့တွေဆီ ထပ်မံအင်အားဖြည့်တင်းဖို့အတွက် မကျီးပင်စက်လှေဂိတ်က တက်လာတဲ့ စစ်ကောင်စီတပ်ဖွဲ့အင်အား ၂၀ လောက်ကို သာယာဝတီခရိုင် PDF တပ်ရင်း ၃၈၀၁ မှ တပ်ခွဲ ၁ (Zigon PDF) ၊ တပ်ခွဲ ၂ (Phoenix)၊ တပ်ခွဲ ၃ (နတ်စစ်သည်) နဲ့ တပ်ခွဲ ၄ (MRF) ပူးပေါင်းတပ်ဖွဲ့တွေက ကြားဖြတ် တိုက်ခိုက်ခဲ့ကြတာလို့ ဆိုပါတယ်။

အထိနာသွားတဲ့ စစ်ကောင်စီတပ်ဘက်က ပြန်လည်ဆုတ်ခွာသွားပြီး  တော်လှန်ရေးတပ်ဖွဲ့ဝင်တွေဘက်ကတော့ အထိအခိုက်မရှိဘူးလို့ ထုတ်ပြန် ချက်မှာ ဖော်ပြပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူလူထုတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာဖြစ်ပြီး နိုင်ငံတဝန်းမှာတော့ ဒေသခံပြည်သူ့ကာကွယ်ရေးတပ်တွေ၊ တိုင်းရင်းသားလက်နက်ကိုင်တပ်တွေနဲ့ အကြမ်းဖက်စစ်ကောင်စီတပ်တွေကြား တိုက်ပွဲတွေလည်း ဖြစ်ပွားနေပါတယ်။