ရန်ကုန်-ပုဂံ အမြန်ရထားကို ဇန်နဝါရီ ၂၃ ရက်ကစပြီး အမှတ် ၆၁ အဆန်နဲ့ အမှတ် ၆၂ အစုန် နေ့စဥ်ပြေးဆွဲပေးသွားမယ်လို့ ကြေညာခဲ့ပေမဲ့ စီးမယ့်သူမရှိလို့ ဇန်နဝါရီ ၂၄ ရက်ကစတင်ကာ တပတ်တရက်သာ ပြေးဆွဲတော့မယ်လို့ မီးရထားနဲ့ နီးစပ်သူတဦးက ဒီဗွီဘီကို ပြောပါတယ်။
“မနေ့က ရန်ကုန်-ပုဂံ ရထားတစီးထွက်သွားပြီ၊ လူသိပ်မရှိဘူး။ ၂၅ ရက်နေ့ကျရင် ပုဂံ-ရန်ကုန် ရထား ပြန်ဆင်းလာလမ့်မယ်။ ၂၇ ရက်နေ့ကစပြီး အပတ်စဥ် သောကြာနေ့ပဲ ရထားထွက်တော့မယ်။”
အမှတ် ၆၁ အဆန်၊ ၆၂ အစုန် ရန်ကုန်-ပုဂံ-ရန်ကုန် အမြန်ရထားလက်မှတ်ခတွေကတော့ ရိုးရိုးတန်း ၇,၂၀၀ ကျပ်၊ အထက်တန်းထိုင်ခုံ ၁၄,၄၀၀ ကျပ်နဲ့ အထက်တန်းအိပ်စင် ၁၉,၈၀၀ ကျပ် ဖြစ်တယ်လို့ ခရီးသွားတဦးက ဒီဗွီဘီကို ပြောပါတယ်။
“ရထားနဲ့သွားရတာ လူတော့သိပ်မရှိဘူး။ ဒါပေမဲ့ စစ်တာဆေးတာ တအားများတော့ မသွားချင်ဘူး။ ရန်ကုန်ကဆို ညနေ ၄ နာရီ ၁၅ ထွက်တယ်၊ ပုဂံ နေ့လယ် ၁၂ နာရီရောက်တယ်။ ပုဂံကပြန်စီးလည်း ဒီအတိုင်းပဲ။”
ရန်ကုန်-ပုဂံ အမြန်ရထား စတင်ပြေးဆွဲရာ ခရီးသည် ၅၄ ယောက်သာရရှိပြီး ခရီးစဥ်တခုကို ဆီဂါလန် ၅၀၀ ကျော်ကုန်ကျတဲ့အတွက် အရှုံးနဲ့ရင်ဆိုင်ရလို့ နေ့စဥ်ပြေးဆွဲမှုကို ရပ်နားရတာလို့ မြန်မာ့မီးရထားမှ အမည်မဖော်လိုသူတဦးက ဒီဗွီဘီကို ပြောပါတယ်။
“အထက်တန်းအိပ်စဥ်နဲ့ အကုန်တွက်ရင်တောင် ၁၀ သိန်းကျော်ပဲရတယ်။ ပြောရရင် ၇ လောက်ပဲရတယ်။ ဆီဖိုးတောင်မရဘူး။ လမ်းပိုင်းတွေကလည်း သိပ်မကောင်းဘူး။”
ခရီးစဥ်တလျှောက် သာယာဝတီ၊ လက်ပံတန်း၊ မင်းလှ၊ အုတ်ဖို၊ ကြို့ပင်ကောက်၊ ဇီးကုန်း၊ နတ္တလင်း၊ ပေါင်းတည် အစရှိတဲ့ ၂၃ ဘူတာကိုလည်း ရပ်ပေးမှာဖြစ်ပြီး လက်မှတ်တွေကို တရက်ကြိုတင် ဝယ်ယူနိုင်သလို မီးရထားဘူတာလက်မှတ်ရုံတွေမှာလည်း ဝယ်ယူနိုင်တယ်လို့ မြန်မာ့မီးရထားကနေ သိရပါတယ်။
