ကယား(ကရင်နီ)ပြည်နယ်၊ ဘောလခဲမြို့နယ်၊ နန်းဖဲကျေးရွာအနီး မယ်စလောင်းတောင်ကုန်းပေါ်မှာ အခိုင်အမာတပ်စွဲထားတဲ့ စစ်ကောင်စီတပ်စခန်းကို  ကရင်နီပူးပေါင်းတပ်ဖွဲ့တွေက ဇန်နဝါရီ ၂၀ ရက် မနက်က တိုက်ခိုက်သိမ်းပိုက်လိုက်ပါတယ်။

ကရင်နီကွန်မန်ဒို၊ KA၊ KNDF B(15)၊ KNDF B(16)၊  KNDF B (09)၊  Loikaw PDF၊ DMO PDF တို့ပူးပေါင်းကာ တိုက်ခိုက်သိမ်းပိုက်နိုင်ခဲ့တာဖြစ်ပြီး စစ်ကောင်စီတပ်သား ၅ ဦး သေဆုံးကာ လက်နက်ခဲယမ်းတွေ သိမ်းဆည်းရမိတယ်လို့  KNDF က ဇန်နဝါရီ ၂၁ ရက် ဒီကနေ့ သတင်းထုတ်ပြန်ပါတယ်။

မယ်စလောင်းတောင်စခန်းကုန်းကို ချေမှုန်းသိမ်းပိုက်နိုင်ခဲ့ရာမှာ သေဆုံးနေတဲ့ စစ်ကောင်စီတပ်သား ၅ ဦးရဲ့  ရုပ်အလောင်းတွေနဲ့ အတူ  ၆၀ မမ စိန်ပြောင်း ၂ လက် ၊ RPG ၁ လက် ၊ MA-1 ၁ လက် ၊MA -2 ၁ လက် ၊ MA-3 ၁ လက် ၊ MA-4- 79 တွဲ ၁ လက် ၊ 9mm ၁ လက် ၊ ငါကြင်းမြီး ၁ လက် ၊ စနိုက်ဘာ ၁ လက် ၊ မိုင်းတွေ ၊ ခဲယမ်းကျည်ဆန်တွေအပြင် တခြားအသုံး အဆောင်တွေ  သိမ်းဆည်းရရှိခဲ့တယ်လို့ ဖော်ပြထားပါတယ်။

မယ်စလောင်းတောင်စခန်းကုန်းကို သိမ်းပိုက်နေ တဖက်မှာလည်း KA ၊ KNDF B (21) ၊ KNDF B (10) ၊ ဘောလခဲ PDF တို့ပူးပေါင်းကာ ဘောလခဲမြို့မှာရှိတဲ့ စစ်ကောင်စီတပ်ရဲ့ ခြေကုပ်စခန်းတချို့ကို ဝင်ရောက်တိုက်ခိုက်ခဲ့ပြီး ကရင်နီတပ်ဖွဲ့တွေ တစ်စုံတစ်ရာထိခိုက်မှုမရှိဘဲ ဆုပ်ခွာနိုင်တယ်လို့ ဆိုပါတယ်။

မယ်စလောင်းတောင်စခန်းသိမ်းတိုက်ပွဲအတွင်း စစ်ကောင်စီတပ်က တိုက်လေယာဉ် တစီးနဲ့ ၃ ကြိမ် တိုင်တိုင်လာရောက်ပစ်ကူပေးခဲ့သလို ဘောလခဲမြို့ အခြေစိုက်စစ်တပ်ကလည်း လက်နက်ကြီးတွေ အဆမတန် အသုံးပြုကာ ပစ်ကူပေးခဲ့တာကြောင့် ကရင်နီတပ်မတော် (KA) က ရဲဘော် တဦး ကျဆုံးခဲ့ရတယ်လို့ ထုတ်ပြန်ချက်မှာ ဖော်ပြပါတယ်။