၂၀၂၂-၂၃ ပညာသင်နှစ်ရဲ့ အခြေခံပညာအတန်း ကျောင်းတွင်းစစ် နှစ်ဆုံးစာမေးပွဲနဲ့ အတန်းပြီးမြောက်မှု စစ်ဆေးတဲ့ စာမေးပွဲတွေကို ဖေဖော်ဝါရီ ဒုတိယအပတ်ကနေ စတင်ကျင်းပဖို့ စစ်ကောင်စီပညာရေးဌာနက ညွှန်ကြားထားပါတယ်။
Grade 5,Grade 9,Grade 11 တွေကလွဲပြီး ကျောင်းတွင်းစာမေးပွဲတွေကို ဖေဖော်ဝါရီ ၁၄ ရက်နေ့ကစတင်ကာ တနင်္ဂနွေနေ့ကလွဲပြီး ဖေဖော်ဝါရ ၂၁ ရက်နေ့အထိကျင်းပရမယ်လို့ သိပါတယ်။
အခြေခံပညာမူလတန်းအဆင့်ပြီးမြောက်မှု စစ်ဆေးခြင်း Grade 5 စာမေးပွဲကိုတော့ ဖေဖော်ဝါရီ ၂၂ ရက်ကနေ ၂၈ ရက်အတွင်းနဲ့ အခြေခံပညာအလယ်တန်းအဆင့်ပြီးမြောက်မှု စစ်ဆေးခြင်း Grade 9 စာမေးပွဲကို ဖေဖော်ဝါရီ ၂၂ ရက်ကနေ မတ် ၁ ရက်အတွင်း အပြီးကျင်းပဖို့ ညွှန်ကြားထားပါတယ်။
အခြေခံပညာအထက်တန်းအဆင့် ပြီးမြောက်မှု စစ်ဆေးခြင်း Grade 11 (သင်ရိုးဟောင်း) ဖေဖော်ဝါရီ ၁၄ ရက်နေ့ကနေ ၂၀ ရက်နေ့အတွင်း အပြီးစစ်ဆေးရမယ်လို့လည်း သိရပါတယ်။
၂၀၂၃ ခုနှစ်ရဲ့ တက္ကသိုလ်ဝင်စာမေးပွဲကိုတော့ မတ် ၈ ရက်နေ့ကနေ ၁၈ ရက်နေ့အတွင်း ကျင်းပဖို့ စစ်ကောင်စီပညာရေးဌာန (မြန်မာနိုင်ငံစာစစ်ဦးစီးဌာန) က ကြေညာထားပြီး စနစ်ဟောင်း သင်ရိုးဟောင်းနောက်ဆုံးစာပေးပွဲကို ဖြေဆိုဖို့ ပြင်ပကနေ လျှောက်ထားတဲ့အရေအတွက်ဟာ ၁ သိန်း ၈ သောင်းလောက်ရှိကာ ဆက်လက် လက်ခံပေးနေတယ်လို့ သိရပါတယ်။
အခုနှစ် စစ်ကောင်စီလက်အောက်မှာ ဖွင့်လှစ်တဲ့အခြေခံပညာကျောင်းတွေကို တနိုင်ငံလုံး အတိုင်းအတာနဲ့ ၇ သိန်းကျော်လောက်တက်ရောက်နေပြီး ပုံမှန်ပညာသင်နှစ်ထက်စာရင် ကျောင်းသားကျောင်းသူ ၃ သန်းလောက်က ပညာသင်ခွင့်ဆုံးရှုံးခဲ့တာဖြစ်ပါတယ်။
