စစ်ကိုင်းတိုင်း၊ ကန့်ဘလူမြို့နယ်မှာ စစ်ကောင်စီတပ်က ပြီးခဲ့တဲ့ ဒီဇင်ဘာလအတွင်း ကျေးရွာ ၉ ကို ဝင်ရောက်မီးရှို့ဖျက်ဆီးခဲ့ရာ လူနေအိမ်ပေါင်း ၂၃၃ လုံး မီးလောင်ပျက်စီး ဆုံးရှုံးခဲ့ရတယ်လို့ ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ (ကန့်ဘလူခရိုင်) က သတင်းထုတ်ပြန်ပါတယ်။
ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ (ကန့်ဘလူခရိုင်) တာဝန်ရှိသူတဦးက “ဇီးပင်သာရွာက ၆ တန်းကျောင်းသား မောင်သုတဇော်ကို စစ်ကောင်စီတပ်က ပစ်ခတ်သတ်ဖြတ်ခဲ့ပြီး ဂါးဂလော်ရွာက ပြည်သူ ၄ ဦးကိုလည်း ဖမ်းဆီးသတ်ဖြတ်ခဲ့တယ်။ ဂါးဂလော်ရွာက ပြည်သူတွေ ဖမ်းဆီးခံရတာရှိပြီး စုံစမ်းနေဆဲဖြစ်တယ်” လို့ ဒီဗွီဘီကို ပြောပါတယ်။
ကန့်ဘလူမြို့နယ်ထဲက ချောင်းကြားရွာ၊ ပင့်သာရွာ၊ ဝက်သအင်းရွာ၊ ဆူးတပ်ရွာ၊ လွှဲဆိပ်ရွာ၊ လက်ခုပ်ကုန်းရွာ၊ ဘောရွာ၊ ဂါးဂလော်ရွာ၊ မြိုင်သာယာရွာ စတဲ့ရွာတွေ မီးရှို့ဖျက်ဆီးခံရတယ်၊ ကျေးရွာတွေကို မီးရှို့ဖျက်ဆီးရာမှာ စစ်ကောင်စီတပ်နဲ့အတူ ပျူစောထီးတွေလည်း ပါဝင်ခဲ့တယ်၊ ဂါးဂလော်ရွာဆိုရင် ၂ ကြိမ် မီးရှို့ခံခဲ့ရတယ်လို့ ဒေသတွင်း တော်လှန်ရေးအဖွဲ့တွေက ထုတ်ပြန်ပြောဆိုပါတယ်။
ပြီးခဲ့တဲ့ နိုဝင်ဘာလအတွင်းကလည်း ကန့်ဘလူနယ်က ရွာတွေကို ဆက်တိုက် မီးရှို့ဖျက်ဆီးခဲ့ပြီး အိမ်ခြေ ၈၉၅ လုံး မီးလောင်ပျက်စီးဆုံးရှုံးခဲ့တယ်လို့ ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ထုတ်ပြန်ချက်မှာ ရေးသားဖော်ပြထားပါတယ်။
