ထိုင်းမြန်မာနယ်စပ် ပရကျူပ်ခီရီခန်ခရိုင်ထဲမှာ ပြီးခဲ့တဲ့ ဒီဇင်ဘာ ၂၆ ရက်နေ့က တရားမဝင် ဝင်ရောက်လာတဲ့ မြန်မာနိုင်ငံသား ၃၅ ဦးကို ဘန် ၂ သန်းကျော်တန်ဖိုးရှိ အိုက်စ်မူးယစ်ဆေး၊ ထိုင်းပွဲစား ၆ ဦးတို့နဲ့အတူ ဖမ်းဆီးရမိတယ်လို့ တာဝန်ရှိသူတွေက ပြောပါတယ်။
နယ်ခြားစောင့်တပ်၊ လဝက ရဲတပ်ဖွဲ့ နဲ့ နယ်မြေခံရဲတွေပါတဲ့ ပူးပေါင်းအဖွဲ့ဟာ ဒီဇင်ဘာ ၂၆ ရက် ညက ပရကျူပ်ခီရီခန်ခရိုင် ထပ်စကယ်မြို့နယ် ဖစ်ကဆဲမ်လမ်းမကြီးပေါ်ရှိ ဟွေ့ယန်းစစ်ဆေး ရေးဂိတ်မှာ ယာဉ်အသွားအလာတွေကို စစ်ဆေးစဉ် မသင်္ကာဖွယ် ဟိုင်းလပ်စ်ကား ၂ စီးကို တားဆီးစစ်ဆေးခဲ့တာလို့ ဆိုပါတယ်။
အဆိုကား ၂ စီးဟာ နောက်ခန်းကို သံနဲ့အခန်းဖွဲ့ကာ တာလပတ်တွေနဲ့ လွှားထားကြောင်း၊ ပထမ ၁ စီးမှာ အပြာရောင် အီဇူးစူးကားဖြစ်ပြီး ကားရှေ့ခန်းမှာ အသက် ၂၆ နှစ်ရွယ် ယာဉ်မောင်း ထိုင်းအမျိုးသား နဲ့ ၂၇ နှစ်ရွယ်အမျိုးသမီး ဘေးကလိုက်လာတယ်လို့ ဆိုပါတယ်။
ဒုတိယ ၁ စီးမှာ အဖြူရောင်အီဇူးစူးကားဖြစ်ပြီး အသက် ၂၀ နဲ့ ၂၇ နှစ်ကြား ထိုင်း ၄ ဦး လိုက်ပါလာကြောင်း၊ ကား ၂ စီးလုံးရဲ့ နောက်ခန်းက တာလပတ်တွေကိုဖယ်ရှားရာမှာ ကုန် တင်ခန်းထဲကနေ တရားမဝင် ဝင်ရောက်လာတဲ့ မြန်မာ ၃၅ ဦး (ကျား ၂၇ ဦး ၊ မ ၈ ဦး) တို့ကို တွေ့ရှိတာလို့ ဆိုပါတယ်။
ဒါ့အပြင် အသက် ၂၇ နှစ်ရွယ်ရှိ မြန်မာအမျိုးသား စိုးလင်းဆိုသူရဲ့ အိတ်ထဲကနေ ၁ ထုတ်ကို အိုက်စ်မူးယစ်ဆေး အလေးချိန် ၁ ကီလိုစီပါသော အထုတ် ၂ ထုတ် သိမ်းဆည်းရမိကြောင်း၊ အဆိုပါ အိုက်စ်ဆေးမှာ ကာလတန်ဖိုး ဘတ် ၂ သန်း ၄ သိန်းရှိတယ်လို့ တာဝန်ရှိသူက ပြောပါတယ်။
စစ်ဆေးမေးမြန်းချက်အရ အဆိုပါမြန်မာနိုင်ငံသားတွေဟာ ရခိုင်ပြည်နယ်၊ ရန်ကုန်တိုင်း၊ တနင်္သာရီတိုင်း ထားဝယ်ဒေသတွေကဖြစ်ပြီး ထိုင်းတောင်ပိုင်း စူရတ်ဌာနီခရိုင်ကို အလုပ်သွား လုပ်ဖို့ဖြစ်ကြောင်း၊ လိုရာခရီးရောက် ပွဲစားကို ၁ ဦးလျှင် ဘတ် ၂၀၀၀၀ ပေးရမှာဖြစ်ပြီး အချို့ ကတော့ မလေးရှားနိုင်ငံဘက်ကို ဆက်ကူးသွားမယ်လို့ ဆိုပါတယ်။
တာဝန်ရှိသူတွေက သူတို့ကို ဥပဒေအရအရေးယူဖို့ မြို့နယ်ရဲစခန်းမှာ ခေါ်ယူထိန်းသိမ်းထားတယ်လို့ ခေါဝ်ဆွတ်ထုင်းသတင်းမှာ ဖော်ပြပါတယ်။
