မကွေးတိုင်း၊ ဆောမြို့နယ်မှာ စစ်ကောင်စီတပ်က ဒီဇင်ဘာ ၂၆ ရက် နေ့လယ်ပိုင်းမှာ ဂျက်တိုက်လေယာဥ်နဲ့ ဗုံးကြဲတိုက်ခိုက်ခဲ့လို့ အရပ်သား ပြည်သူ ၄ ယောက်သေဆုံးကာ ၆ ယောက်လောက် ဒဏ်ရာရရှိခဲ့တယ်လို့ ဒေသခံတွေထံက သိရပါတယ်။
ဆောမြို့နယ်၊ ညောင်ကန်ကျေးရွာကို ဒီနေ့ မွန်းတည့် ၁၂ နာရီလောက်က တိုက်ပွဲဖြစ်ပွားတာမရှိဘဲ စစ်ကောင်စီဘက်က ဂျက်တိုက်လေယာဥ်တစီးနဲ့ လာရောက်ဗုံးကြဲ တိုက်ခိုက်ခဲ့လို့ မိသားတစုတည်းက ၃ ယောက်နဲ့ တခြားတအိမ်က တယောက် သေဆုံးခဲ့တယ်လို့ ညောင်ကန်ကျေးရွာ ဒေသခံတယောက်က ဒီဗွီဘီကို ပြောပါတယ်။
“စစ်ကောင်စီရဲ့ ဂျက်တိုက်လေယာဥ်က အမှတ်မထင်ရောက်လာပြီး ဗုံးတွေကြဲ၊ စက်သေနတ်တွေနဲ့လည်း ပစ်ခတ်လို့ နေအိမ် ၆ လုံးလောက် ထိခိုက်ပျက်စီးသွားတယ်။ ဒဏ်ရာရရှိတဲ့ လူနာတွေကိုတော့ ကူညီကယ်ဆယ်ရေးတွေ လုပ်ဆောင်ကာ ဆေးဝါးကုသမှုတွေ လုပ်ဆောင်ပေးထားပြီး အပြင်းအထန် ဒဏ်ရာရရှိခဲ့တဲ့ ၂ ယောက် ကတော့ အခြေအနေ စိုးရိမ်ရတယ်။”
မကွေးတိုင်း၊ မြိုင်မြို့နယ်မှာလည်း ဒီဇင်ဘာ ၂၃ ရက် ညနေပိုင်းက ကျေးရွာ ၃ ရွာလောက်ကို တိုက်ပွဲမဖြစ်ပွားဘဲ စစ်တပ်က Mi35 တိုက်ခိုက်ရေးရဟတ်ယာဥ်တစီးနဲ့ လေကြောင်းတိုက်ခိုက်မှု ပြုလုပ်ခဲ့လို့ အဆောက်အဦတွေ ထိခိုက်ပျက်စီးခဲ့တယ်လို့ သိရပါတယ်။
