ရခိုင်ပြည်နယ်၊ ကျောက်တော်မြို့အနီးရှိ မဟာမုနိဘုရားမှာ တပ်စွဲထားတဲ့ စစ်ကောင်စီလက်အောက်ခံ  စကခ-၉ တပ်မက တပ်ဖွဲ့ဝင်တယောက် ဒီဇင်ဘာ ၂၀ ရက်က ထွက်ပြေးသွားတယ်လို့ စစ်ကောင်စီတပ်သားတွေ  ကျောက်တော်မဟာမုနိ စစ်ဘေးရှောင်စခန်းကို သေနတ်ပစ်ခတ် ဝင်ရောက်စစ်ဆေးရှာဖွေခဲ့တယ်လို့ စစ်ဘေးရှောင်တွေက ပြောပါတယ်။

ထွက်ပြေးသွားသူကိုရှာဖွေဖို့ စစ်ကောင်စီတပ်က အင်အား ၂၀ လောက်နဲ့   ဒုက္ခသည်စခန်းထဲ  သေနတ်ပစ်ဖောက်ဝင်ရောက်လာကာ စခန်းအတွင်းရှိ လူနေအိမ်တွေကို ဝင်ရောက်ရှာဖွေသွားတာ လို့ဆိုပါတယ်။

စစ်ဘေးရှောင်တဦးက "မဟာမုနိဘုရားမှာတပ်စွဲထားတဲ့ တပ်သားတစ်ယောက်က မနေချင်တော့လို့ထွက်ပြေးသွားတာလို့သိရတယ်။ အဲဒါ​ကို စစ်ဘေးရှောင်စခန်းနေအိမ်တွေမှာ ဝှက်ထားသလားဆိုတဲ့ သံသယနဲ့ သေနတ်တွေပစ်ပြီး  ဝင်လာပြီး နေအိမ်တချို့ကို ရှာဖွေခဲ့တာ"လို့ ပြောပါတယ်။ 

မဟာမုနိစစ်ဘေးရှောင်စခန်းမှာ စစ်ဘေးရှောင် အိမ်ထောင်စု ၄၃၂ စု လူဦးရေ ၁၆၅၆ ဦးနေထိုင်နေကြတာဖြစ်ပြီး ထွက်ပြေးသွားသူကိုတော့ ရှာမတွေ့ခဲ့ပါဘူး။ ပြီးခဲ့တဲ့ စက်တင်ဘာလကတော့ ထွက်ပြေးသွားတဲ့ စစ်ကောင်စီ တပ်သား ၂ ယောက် စစ်ဘေးရှောင်စခန်းအနီးတဝိုက်မှာ ရှာတွေ့ခဲ့တာဖြစ်ပါတယ်။

ပြီးခဲ့တဲ့ အောက်တိုဘာ ၁၇ ရက်ကလည်း ပုဏ္ဏားကျွန်းမြို့ အခြေစိုက် ခမရ ၅၅၀ တပ်ရင်းမှ စစ်ကောင်စီတပ်သား  ၉  ယောက်ထွက်ပြေးသွားခဲ့ပါတယ်။

ရခိုင်ပြည်နယ်မှာ စစ်တပ်အာဏာသိမ်းပြီးနောက်ပိုင်း ရက္ခိုင့်တပ်တော် (အေအေ) ထံ ထွက်ပြေးခိုလှုံလာကြတဲ့ စစ်ကောင်စီတပ်က အရာရှိ၊ စစ်သည်အပါအဝင် တပ်ဖွဲ့ဝင် ၁၀၀ ကျော် ရှိပြီး အေအေ ပြန်ကြားရေးတာဝန်ခံ ဦးခိုင်သုခက ပြောထားပါတယ်။

ရခိုင်ပြည်နယ်၊ ကျောက်တော်-ပလက်ဝ ရေကြောင်းလမ်းကို မကြာမီ ပြန်ပိတ်သွားမယ်လို့ စစ်ကောင်စီခန့် ရခိုင်ပြည်နယ် နယ်လုံဝန်ကြီး ဗိုလ်မှူးကြီးကျော်သူရက ဒီဇင်ဘာ ၁၉ ရက်မှာ ပြောကြားခဲ့တယ်လို့ စစ်တွေ ထွေအုပ်နဲ့ နီးစပ်သူတွေက ပြောပါတယ်။

“ဘယ်နေ့ပြန်ပိတ်မယ် ဆိုတာတော့ မပြောဘူးဗျ။ မကြာမီ ပြန်ပိတ်မယ်လို့တော့ ပြောတယ်။ လုံခြုံရေးကြောင့်လို့တော့ သိရတယ်။ ပြန်ဖွင့်ပေးတာလည်း မကြာသေးဘူးလေ။”

ကျောက်တော်-ပလက်ဝ ရေလမ်းကြောင်းကို စစ်ကောင်စီနဲ့ ရက္ခိုင့်တပ်တော် (အေအေ) တို့ အပစ်အခတ် ရပ်စဲပြီးနောက် ပြီးခဲ့တဲ့ ဒီဇင်ဘာ ၃ ရက်က စတင် သွားလာခွင့် ပြုထားခဲ့ပေမဲ့ ဒီနေ့အထိ ပြည်သူပိုင်ရေယာဥ်တွေကို သွားလာခွင့် မရလို့ ဒေသခံတွေ အခက်တွေ့နေတယ်လို့ ကျောက်တော်ဒေသခံ မော်တော်ဘုတ်သမားတဦးက ပြောပါတယ်။

“ကျောက်တော်-ပလက်ဝ ရေလမ်းပြန်ဖွင့်တယ်လို့သာ ပြောတယ်။ ဒေသခံ မော်တော်ဘုတ်တွေ တစီးမှ သွားမရသေးဘူး။ စစ်ကောင်စီ စစ်ရေယာဥ်တွေပဲ သွားလာနေကြတာ။ ကျနော်တို့ မော်တော်ဘုတ်သမားတွေ အလုပ်လက်မဲ့ ဖြစ်နေကြတယ်။ ပလက်ဝက ‌ဒေသခံတွေလည်း အခက်အခဲတွေ့နေကြရတယ်။”

ဒီဇင်ဘာ ၂၂ ရက် မနက် ၉ နာရီခွဲက ကျောက်တော်အခြေစိုက် စကခ-၉ မှ လက်နက်နဲ့ စားနပ်ရိက္ခာအပြည့် တင်ဆောင်ထားတဲ့ စစ်ကောင်စီ ရေတပ်စစ်သင်္ဘော ၄ စီး ကျောက်တော်ကနေ ပလက်ဝကို တက်သွားတယ်လို့ ဒေသခံတွေဆီက သိရပါတယ်။