မကွေးမြို့နယ် ထုံးပေါက်တော (မြောက်)ရွာမှာ ဒီဇင်ဘာ ၂၃ ရက်နေ့ မနက်အစောပိုင်းက မီးလောင်မှုဖြစ်ပွားပြီး နေအိမ် ၈ လုံး ဆုံးရှုံးခဲ့တယ်လို့ ဒေသခံတွေဆီကနေ သိရပါတယ်။
ထုံးပေါက်တော(မြောက်)ရွာမှာ ဒီနေ့မနက်အစောပိုင်း ၁၂ နာရီ ၅ မိနစ်လောက်က မီးကြွင်းမီးကျန်ကနေတဆင့် မီးလောင်မှု ဖြစ်ပွားခဲ့ပြီး နေအိမ် ၈ လုံး၊ နွားတင်းကုတ် ၂ လုံးနဲ့ ဆိုင်ကယ် ၆ စီး မီးလောင်ဆုံးရှုံးခဲ့တယ်လို့ ထုံးပေါက်တောကျေးရွာဒေသခံတယောက်က ပြောပါတယ်။
ထုံးပေါက်တောကျေးရွာက ကိုဝင်းထွန်းရဲ့နေအိမ် မီးကြွင်းမီးကျန်ကနေ ပေါ့ဆမှုကြောင့် မီးလောင်ကျွမ်းရတာဖြစ်ပြီး မကွေးမြို့က မီးသတ်ကား ၄ စီး၊ ပရဟိတကားတွေ၊ ရွာသူရွာသားတွေ ဝိုင်းဝန်း ငြှိမ်းသတ်ခဲ့ကြလို့ မနက် ၁၂ နာရီ ၄၅ မိနစ်လောက်မှာ မီးငြိမ်းသွားတယ်လို့ ဆိုပါတယ်။
မီးကို ပေါ့ဆစွာ အသုံးပြုတဲ့ ကိုဝင်းထွန်းကိုတော့ သက်ဆိုင်ရာတာဝန်ရှိသူတွေက စစ်ဆေးမေးမြန်းတာတွေ ပြုလုပ်ပြီး မီးပေါ့ဆမှုနဲ့ အမှုဖွင့် အရေးယူထားတယ်လို့ သိရပါတယ်။
