စစ်ကိုင်းတိုင်း၊ မုံရွာမြို့နယ်မှာ ဒီဇင်ဘာ ၂၀ ရက် နေ့လယ် ၂ နာရီ မိနစ် ၄၀ လောက်က မြို့တွင်းတနေရာမှာ စျေးဝယ်ရန်ထွက်လာတဲ့ ရဲသုံးယောက်ကို တိုက်ခိုက်ခဲ့တယ်လို့ Special Forces-11 တာဝန်ရှိသူက ပြောပါတယ်။
Special Forces-11 ရဲဘော်တွေက ဦးဆောင်ပြီး မုံရွာမြို့နယ် (ပ.က.ဖ) ၊ (ပ.လ.ဖ) ရဲဘော်တွေနဲ့အတူ ပူးပေါင်း တိုက်ခိုက်ခဲ့တာကြောင့် ရဲတစ်ယောက်သေဆုံးပြီး ကျန်နှစ်ယောက်ကတော့ ကျည်ဆန်ထိမှန်ကာ ထွက်ပြေးလွတ်မြောက်သွားတယ်လို့ဆိုပါတယ်။
Special Forces-11 မှ တာဝန်ရှိသူတဦးက "ရခတကောင်သေပြီး နှစ်ကောင်မှာ ကျည်ထိမှန်ဒဏ်ရာတွေနဲ့ သွေးရူးသွေးတန်း ထွက်ပြေးသွားခဲ့တယ်။ ကျနော်တို့ရဲဘော်တွေတော့အထိအခိုက်မရှိဘဲ ဆုတ်ခွာနိုင်ခဲ့တယ်" လို့ ပြောပါတယ်။
အဆိုပါတိုက်ခိုက်ခဲ့မှုမှာ ရဲတွေရဲ့ MA13 တလက် ၊ ကျည် ၂၀၁၀ ထုတ်၊ ၉မမ ၁၅ တောင့်၊ ကျည်ဘောက်တစ်ခု တို့အားသိမ်းဆည်းရမိခဲ့တယ်လို့လည်း သိရပါတယ်။
သေဆုံးတဲ့ ရဲတစ်ယောက်နဲ့ ကျည်ထိမှန် ဒဏ်ရာများဖြင့်ထွက်ပြေးသွားတဲ့ ရဲ နှစ်ယောက်ကို လာရောက်သယ်ယူတဲ့ လူနာတင်ကား တစ်စီးကို မုံရွာ-ချောင်းဦးလမ်းပိုင်းတစ်နေရာမှာ ပဒေသာမိုင်း ၅ လုံးနဲ့ မိုင်းဆွဲတိုက်ခိုက်ခဲ့တယ်လို့လည်းသိရပါတယ်။
ဒါ့အပြင်အဖွဲ့အနေနဲ့ မိုင်းအလုံး ၃၀၀ ကန်ပိန်းမှာ မဲလက်မှတ်တွေရောင်းချဖို့ရှိနေပြီး ပြည်သူတွေပါဝင်ကူညီပေးကြဖို့လည်း တောင်းဆိုထားပါတယ်။
