မကွေးတိုင်း၊ မင်းတုန်းမြို့နယ်မှာ ဒီဇင်ဘာ ၁၅ ရက် မနက်ပိုင်းက စစ်ကောင်စီသတင်းပေး တယောက်ရှင်းလင်းခံရတာကြောင့် စစ်ဆေးဖို့လာတဲ့ စစ်ကောင်စီတပ်သားတွေနဲ့ ရဲတွေကို ပြည်သူ့ကာကွယ်ရေးတပ်ဖွဲ့တွေက မိုင်းဆွဲတိုက်ခိုက်ခဲ့တယ်လို့ Eagle Force ဆီက သိရပါတယ်။

လက်ပွကျေးရွာက စစ်ကောင်စီသတင်းပေး ဦးစိုးငြိမ်းကို ဒီဇင်ဘာ ၁၅ ရက် မနက် ၇ နာရီ လောက်မှာ သရက်၊ ကံမ၊ မင်းတုန်း Egale Force ပူးပေါင်း ပ.က.ဖ တပ်ဖွဲ့က သူ့ရဲ့ နေအိမ်ကို သွားရောက်ပြီးပစ်ခတ်ရှင်းလင်းခဲ့တယ်လို့ Egale Force ပ.က.ဖ ရဲ့ ပြန်ကြားရေးတာဝန်ခံ ကိုမြတ်က ပြောပါတယ်။

အဲဒီဖြစ်စဥ်ကို စစ်ဆေးဖို့လာတဲ့ စစ်ကောင်စီ ရဲဗိုလ်မှူးတယောက် အပါအဝင် ၈ ယောက်၊ ဒုရဲမှူးတယောက်အပါဝင် ရဲ ၁၃ ယောက် လိုက်ပါလာတဲ့ စစ်ကောင်စီယာဥ်တန်းကို ဒီဇင်ဘာ ၁၅ ရက် မနက် ၁၀ နာရီလောက်မှာ လက်လုပ်မိုင်း  ၄ လုံးနဲ့ မိုင်းဆွဲတိုက်ခိုက်ခဲ့လို့ စစ်ကောင်စီ ဘက်က ၁ ယောက်သေဆုံးကာ ၅ ယောက် ဒဏ်ရာရရှိပြီး ဆေးရုံတင်ထားရတယ်လို့ ဒေသခံ တွေဆီကတဆင့် စုံစမ်းသိရှိရတယ်လို့ ဆိုပါတယ်။

စိုးငြိမ်းဦးက သတင်းပေးခဲ့လို့ သြဂုတ် ၂၉ ရက်က စစ်ကောင်စီတပ်က လက်ပွရွာနဲ့ မှိုက်ရွာကို အင်အားအလုံးရင်းနဲ့ စစ်ကြောင်းထိုးပြီး ပ.က.ဖ ရဲဘော် ၂ ယောက်နဲ့ လက်ပွရွာက ပြည်သူ တယောက်ကို သတ်ဖြတ်ပြီး ရွာသား ၄၀ လောက်ကိုလည်း ဖမ်းဆီးနှိပ်စက်ခဲ့ကြတယ်လို့ ကိုမြတ်က ဆိုပါတယ်။

Eagle Force ပူးပေါင်း ပ.က.ဖ တပ်ဖွဲ့အနေနဲ့ ဒီဇင်ဘာ ၁၂ ရက်ကလည်း သရက်မြို့ က.ပ.စ(၁၂) ကို သွယ်တန်းထားတဲ့ လျှပ်စစ်မီးတိုင်ကို အဝေးထိန်းမိုင်း ၁ လုံးနဲ့ ဖောက်ခွဲတိုက်ခိုက်ခဲ့လို့ လျှပ်စစ်မီးလိုင်းတွေ ပျက်စီးခဲ့ပါတယ်။