စစ်ကိုင်းတိုင်း၊ ကောလင်းခရိုင်၊ ကောလင်းမြို့နယ်၊ ပေပင်ချောင်ရွာကို စစ်ကောင်စီတပ်သားတွေက ဒီဇင်ဘာ ၁၁ ရက်နေ့မှာ စစ်ကြောင်းထိုးဝင်ရောက်မီးရှို့ပြီးနောက် သတ်ဖြတ်ထားခဲ့တဲ့ အမျိုးသား ၅ ဦး အလောင်းတွေကို တွေ့ရှိခဲ့ရတယ်လို့ ဒေသခံတွေက ပြောပါတယ်။
ဦးသိန်းအောင်၊ ဦးအဲမောင်၊ နိုင်ဝင်းထွန်း၊ ကံမင်းစိုးနဲ့ ဦးမြင့်စိုးတို့ရဲ့ ရုပ်အလောင်းတွေကို စစ်ကောင်စီတပ် စစ်ကြောင်းထွက်သွားပြီးချိန်မှာ တွေ့ရှိခဲ့ရတယ်လို့ ဒေသခံတဦးက ပြောပါတယ်။
"သူတို့စစ်ကြောင်းဝင်လာချိန် မပြေးနိုင်ဘဲ ကျန်ခဲ့တဲ့သူတွေပါ။ တခြားထွက်ပြေးပြီး မလွတ်လို့ သတ်ခံရတာတွေလည်းရှိပါတယ်၊ နှိပ်စက်ပြီးကို သတ်ထားတာပါ" လို့ ဒေသခံတဦးက ပြောပါတယ်။
စစ်ကောင်စီတပ်သားတွေက ဒီဇင်ဘာ ၁၁ ရက်နေ့မှာ ကုက္ကိုကုန်းရွာက နေအိမ် ၈၇ လုံး၊ ပေပင်ချောင်ရွာက နေအိမ် ၃၉ လုံးနဲ့ ညောင်ကုန်းရွာက နေအိမ် ၂၉ လုံးတို့ကို မီးရှို့ဖျက်ဆီးခဲ့တယ်လို့ ဆိုပါတယ်။
စစ်ကောင်စီတပ်စစ်ကြောင်းက ဒီဇင်ဘာ ၉ ရက်နေ့က စတင်ပြီး စစ်ကြောင်းထိုး ဝင်ရောက်မီးရှို့တာကြောင့် ကျေးရွာ ၅ ရွာက နေအိမ် ၂၂၄ လုံး မီးလောင်ဆုံးရှုံးခဲ့တယ်လို့ ဒေသခံတွေက ပြောပါတယ်။
ကောလင်းမြို့နယ်ထဲကို စစ်တပ်စစ်ကြောင်းထိုးနေတာကြောင့် ကျေးရွာ ၂၃ ရွာက ဒေသခံရွာသား ၂ သောင်းကျော်ထွက်ပြေးနေရပြီး စားနပ်ရိက္ခာနဲ့စောင်တွေ လိုအပ်နေတယ်လို့ ဆိုပါတယ်။
