မကွေးတိုင်း၊ ပေါက်မြို့နယ်၊ ကူးကားကျေးရွာကို ဒီဇင်ဘာ ၁၁ ရက် ည ၇ နာရီလောက်မှာ စစ်ကောင်စီ စစ်ကြောင်းက ဝင်ရောက်မီးရှို့ခဲ့လို့ အိမ်ခြေ ၅၀ ကျော် မီးလောင်ဆုံးရှုံးခဲ့တယ်လို့ ဒေသခံတွေဆီက သိရပါတယ်။
ကူးကားကျေးရွာ ဒေသခံတယောက်က“စစ်(...)၊ ပျူ(...) အင်အား ၁၀၀ ကျော်လောက်ပါတဲ့ စစ်ကြောင်းဟာ ကျနော်တို့ရွာက ဘုရားကုန်းပေါ်မှာ ဒီဇင်ဘာလ ၈ ရက်နေ့ကတည်းက လက်နက်ကြီး လက်နက်ငယ်တွေနဲ့ ပစ်ခတ်ဝင်ရောက်ကာ ဘုရားကုန်းပေါ်မှာ ၃ ညအိပ် တပ်စွဲခဲ့ပြီး ပြည်သူတွေရဲ့ နေအိမ်တွေကို ဝင်ရောက်မွှေနှောက်ကာ အဖိုးတန်ပစ္စည်းတွေနဲ့ ငွေကြေးတွေကိုလည်း ခိုးယူသွားကြတယ်။”လို့ပြောပါတယ်။
စစ်ကောင်စီစစ်ကြောင်းက လက်နက်ကြီး လက်နက်ငယ်တွေနဲ့ ပစ်ခတ်ပြီး ဝင်လာလို့ အိမ်ခြေ ၁၀၀ ကျော်ရှိ ရွာသူရွာသားတွေအားလုံး ဘေးလွတ်ရာ တောထဲတွေကို ထွက်ပြေးတိမ်းရှောင်ခဲ့ရပြီး စားနပ်ရိက္ခာ၊ ဆေးဝါး၊ အဝတ်အထည်နဲ့ ကျန်းမာရေးစောင့်ရှောက်မှု အကူအညီတွေ လိုအပ်နေတယ်လို့ ဆိုပါတယ်။
စစ်ကောင်စီဘက်က စစ်ကြောင်း ၂ ကြောင်းခွဲကာ ပေါက်မြို့နယ် မြောက်ပိုင်းကို နိုဝင်ဘာ ၁၉ ရက်နေ့ကဝင်ရောက်ခဲ့ပြီး တောင်ပိုင်းကို ဒီဇင်ဘာ ၇ ရက်မှ ဒီဇင်ဘာ ၁၂ ရက်နေ့အထိ စစ်ကြောင်းထိုးဝင်ရောက်ခဲ့တာဖြစ်ပါတယ်။
စစ်ကြောင်းထိုးဝင်ရောက်ပြီး မီးရှို့ဖျက်ဆီးခဲ့လို့ ကျေးရွာ ၁၇ ရွာက အိမ်ခြေ ၁,၅၀၀ လောက် မီးလောင်ဆုံးရှုံးခဲ့ပြီး ဒေသခံပြည်သူ ၁၆,၀၀၀ လောက် ဘေးလွတ်ရာကို ထွက်ပြေးတိမ်းရှောင်နေရကာ လူသားချင်းစာနာမှုဆိုင်ရာ အရေးပေါ် အကူအညီတွေ လိုအပ်နေပါတယ်။
