ကရင်ပြည်နယ်၊ ကော့ကရိတ်မြို့နယ်၊ မောင်းမရွာသစ်ကျေးရွာ ဘ.ကစာသင်ကျောင်းပေါ် ဒီဇင်ဘာ ၆ ရက် မွန်းတည့် ၁၂ နာရီကျော်လောက်က စစ်ကောင်စီရဲ့ လက်နက်ကြီး ကျရောက်ပေါက်ကွဲလို့ ကျောင်းဆရာမတဦးနဲ့ ကျောင်းသားတဦး ထိမှန်ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
ကော့ကရိတ်မြို့အခြေစိုက် စစ်ကောင်စီရဲ့ခလရ ၉၇ တပ်တွင်းကနေ မောင်းမကျေးရွာအတွင်းကို လက်နက်ကြီး ၃ လုံး ပစ်ခတ်ခဲ့တဲ့အတွက် ဘ-က စာသင်ကျောင်းက ကျောင်းဆရာမ မျက်နှာနဲ့ လက်တွေမှာ ထိမှန်ခဲ့ပြီး ၇ နှစ်အရွယ် ကျောင်းသားကတော့ ဘယ်ဘက်လက်မောင်း (စိုးရိမ်ရ) ဒဏ်ရာတွေ ရရှိခဲ့ပါတယ်။
ဒေသခံရွာသားတဦးက "ကော့ကရိတ်တပ်ကနေပြီး လက်နက်ကြီးနဲ့ပစ်တာ ဟုတ်တယ်။ ၃ လုံးပစ်တာ၊ ၂ လုံးက ကျောင်းအနီးမှာကျတယ်။ ၁ လုံးက စာသင်ကျောင်းအမိုးပေါ် တည့်တည့်ကျရောက်တာ။ တော်သေးတယ်။ ကလေးတွေ အိမ်ပြန်ထမင်းစားချိန်ဖြစ်နေလို့ပေါ့။ နောက်မဟုတ်ရင် ကလေးတွေအများကြီးထိမှာ” လို့ ပြောပါတယ်။
ဒီဇင်ဘာ ၃ ရက် မနက် ၁၀ နာရီလောက်ကလည်း ကော့ကရိတ်အခြေစိုက် စစ်ကောင်စီအမြောက်တပ်က ကော့ကရိတ်မြို့နယ် တောင်ကြားအင်းကျေးရွာအုပ်စု ကျွန်းတောကျေးရွာကို လက်နက်ကြီး နဲ့ ပစ်ခတ်ခဲ့တဲ့အတွက် လူ၊ နေအိမ်၊ အိမ်မွေးတိရစ္ဆာန်နဲ့ မော်တော်ယာဉ်တွေ ထိမှန်ခဲ့ပါတယ်။
အောက်တိုဘာ ၁၉ ရက်နေ့ကစတင်ပြီး ကေအန်ယူ တပ်မဟာ ၆ နယ်မြေ၊ ကော့ကရိတ်- မြ၀တီ(အာရှလမ်း)တောနောရေတံခွန်အနီးမှာ စစ်ကောင်စီရဲ့ ပူးပေါင်းတပ်နဲ့ KNLA ပူးပေါင်းတပ်ဖွဲ့တို့ နှစ်ဖက်တိုက်ပွဲဖြစ်ပွားခဲ့ရာက အောက်တိုဘာ ၂၁ ရက်မှာ ထပ်မံပြီး မြို့တွင်းတိုက်ပွဲတွေဖြစ်ပွားခဲ့ပါတယ်။
အဲဒီတိုက်ပွဲတွေ ဖြစ်ပွားပြီးနောက်ပိုင်း စစ်ကောင်စီပူးပေါင်းတပ်တွေဟာ ကော့ကရိတ်မြို့ အနီးဝန်းကျင်ကို လူအင်အားတိုးပြီး စစ်ကြောင်ထိုးစစ်ရေးလှုပ်ရှားတဲ့အတွက် KNLA ပူးပေါင်းတပ်တွေနဲ့ တိုက်ပွဲတွေ ဖြစ်ပွားနေပါတယ်။
နှစ်ဖက်တိုက်ပွဲဖြစ်ပွားပြီးတိုင်း စစ်ကောင်စီက ဒေသခံကျေးရွာတွေအတွင်းကို လက်နက်ကြီးအပြင် လေကြောင်းတိုက်ခိုက်မှုတွေပါ ဆက်တိုက်လုပ်ဆောင်လာတဲ့အတွက် ဒေသခံပြည်သူတွေ ထွက်ပြေးတိမ်းရှောင်နေရပါတယ်။