မွန်ပြည်နယ်၊ ပေါင်မြို့နယ်၊ ထန်းပင်ချောင်ကြီးကျေးရွာမှာ ဒီဇင်ဘာ ၇ ရက်နေ့ မနက် ၇ နာရီခွဲလောက်က မီးလောင်မှု ဖြစ်ပွားခဲ့တာကြောင့် နေအိမ် ၅ လုံး ပျက်စီးဆုံးရှုံးခဲ့တယ်လို့ ဒေသခံတွေက ပြောပါတယ်။
ထန်းပင်ချောင်ကြီးကျေးရွာ၊ ကွက်သစ်ပိုင်း ဦးရွှေထွန်း နေအိမ်မှာ ဘုရားမီး ပူဇော်ထားတဲ့ ဖယောင်းတိုင်မီးကဆင့် မီးကူးစက် လောင်ကျွမ်းခဲ့တာပြီး မနက် ၈ နာရီ ၁၃ မိနစ်မှာ မီးငြှိမ်းသတ်နိုင်ခဲ့ပါတယ်။
မီးလောင်မှုကြောင့် လူထိခိုက်ဒဏ်ရာရတာ မရှိပေမယ့် နေအိမ် ၅ လုံး ပျက်စီးခဲ့ပြီး ကာလတန်ဖိုး ကျပ် သိန်း ၅၀ ဆုံးရှုံးခဲ့တယ်လို့ ပေါင်မြို့နယ်မီးသတ်ဦးစီးဌာနကနေ သိရပါတယ်။
လက်ရှိမှာ မီးဘေးသင့်ပြည်သူ ၃၀ ကျော်ကို နီးစပ်ရာ ဆွေမျိုးနေအိမ်တွေကို ယာယီပြောင်းရွှေ့ထားတယ်လို့ ဒေသခံတဦးက ပြောပါတယ်။
ပေါင်မြို့နယ်၊ ဇင်းကျိုက်မြို့မှာ ပြီးခဲ့တဲ့ နိုဝင်ဘာ ၁၀ ရက်နေ့ကလည်း နေအိမ် ၈ လုံး မီးလောင်မှု ဖြစ်ပွားခဲ့ပြီး အဲဒီမီးလောင်မှုကြောင့် လူ ၄ ဦး သေဆုံးထားပါတယ်။