မကွေးတိုင်း၊ ပခုက္ကူမြို့နယ်မှာ ဒီဇင်ဘာ ၅ ရက် မွန်းလွဲပိုင်းက ခရီးသွားပြည်သူ ၂ ယောက်ကို PDF နဲ့ ဆက်စပ်တယ်လို့ စွပ်စွဲပြီး စစ်ကောင်စီတပ်က ဖမ်းဆီးသွားတယ်လို့ ဒေသခံတွေဆီကနေ သိရပါတယ်။
ပေါက်မြို့ကနေ ပခုက္ကူမြို့ဘက်ကို ထွက်လာတဲ့ အောင်တံခွန် ခရီးသည်တင်ကားတစီးကို ဒီဇင်ဘာ ၅ ရက် မွန်းလွဲ ၂ နာရီလောက်မှာ စစ်ကောင်စီတပ်သားတွေနဲ့ အပေါင်းပါတွေက ပေါက်-ပခုက္ကူကားလမ်း ဆင်လမ်းကျေးရွာနားမှာ တားမြစ်စစ်ဆေးပြီး ကားပေါ်ပါလာတဲ့ ခရီးသည်တွေရဲ့ လက်ကိုင်ဖုန်းတွေကို စစ်ဆေးကာ ကိုနန်းလှိုင်ထွေးနဲ့ ကိုဝင်းထက်အောင်တို့ ၂ ယောက်ကို ဖမ်းဆီးသွားတယ်လို့ ဆင်လမ်းကျေးရွာ ဒေသခံတယောက်က ဒီဗွီဘီကို ပြောပါတယ်။
စစ်ကောင်စီတပ်သားတွေက သူတို့နှစ်ယောက်ကို အဲဒီကားပေါ်ကနေ ဆွဲချပြီး ပခုက္ကူမြို့မရဲစခန်း စစ်ကြောရေးကို ခေါ်ဆောင်သွားကြတယ်လို့ ဆိုပါတယ်။
ပခုက္ကူမြို့ပေါ်မှာလည်း စစ်ကောင်စီတပ်သားတွေက လုံခြုံရေးတင်းကျပ်ထားပြီး ဆိုင်ကယ် ၂ ယောက်စီးနင်းတဲ့သူတွေကို ဆက်တိုက်ဖမ်းဆီးနေကာ ငွေညှစ်တာတွေ ပြုလုပ်ပြီး လက်ကိုင်ဖုန်းထဲမှာ PDF နဲ့ပတ်သက်တဲ့ အချက်အလက်တွေ တွေ့ရင်တော့ အမှုဖွင့်၊ တရားစွဲတင်တာတွေ ပြုလုပ်တယ်လို့ ပြောပါတယ်။
စစ်ကောင်စီက နိုင်ငံတော်အာဏာကို မတရားသိမ်းပိုက်တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်ကနေ ၂၀၂၂ ခုနှစ်၊ ဒီဇင်ဘာ ၅ ရက်အထိ နိုင်ငံတဝန်း မတရား ဖမ်းဆီးချုပ်နှောင်ခံထားရသူ ၁၃,၀၄၈ ယောက်ရှိပြီး အဲဒီထဲက ၁,၆၈၁ ယောက် ထောင်ဒဏ် ချမှတ်ခံထားရတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း (AAPP) က ဒီဇင်ဘာ ၅ ရက်မှာ ထုတ်ပြန်ထားပါတယ်။
