တနင်္သာရီတိုင်း လောင်းလုံးမြို့နယ်ထဲမှာ စပါးရိတ်စက်နဲ့ စပါးရိတ်သိမ်းခဟာ ၂ နှစ်အတွင်း ၂ ဆနီးပါး မြင့်တက်လာတယ်လို့ ဒေသခံလယ်သမားတွေက ပြောပါတယ်။
ပြီးခဲ့တဲ့ ၂ နှစ်က စက်နဲ့ စပါးရိတ်သိမ်းခဟာ လယ် ၁ ဧကကို ငါးသောင်းဝန်းကျင်သာ ရှိခဲ့ရာက ဒီနှစ်မှာတော့ လယ် ၁ ဧကကို ၁ သိန်းလောက်အထိ ကုန်ကျနေတာပါ။
စက်သုံးအပိုပစ္စည်းနဲ့ စက်သုံးဆီ စျေးနှုန်းတွေ မြင့်တက်လာတာကြောင့် စပါးရိတ်ခလည်း အခုလို မြင့်တက်လာရတာလို့ လောင်းလုံးဒေသခံ စပါးရိတ်စက်ပိုင်ရှင် တဦးက ပြောပါတယ်။
"၂၀၂၀ လောက်က စပါးရိတ်ခက ငါးသောင်းကျော်ပဲ၊ အဲတုန်းက ဒီဇယ် ၁ ပီပါ ၁၃၀,၀၀၀ လောက်ပဲ။ အခုဆီစျေးနှုန်းက အဲဒီတုန်းက စျေးနဲ့ တော်တော်ကွာတာ။ စက်အပိုပစ္စည်းလည်း အဲဒီလိုပဲ။ ၁ သိန်းတန်ပစ္စည်းက အခု ၂ သိန်းကျော်ကို ရောက်သွားတယ်။ ဒါကြောင့် ဒီနှစ် စပါးရိတ်ခက ၁ သိန်းလောက်ဖြစ်သွားတာ။"
မြန်မာနိုင်ငံမှာ ၂၀၂၀ နှောင်းပိုင်းလောက်က ဒီဇယ် ၁ ပီပါ စျေးနှုန်း ၁ သိန်းကျော်သာရှိခဲ့ရာကနေ လက်ရှိ ၁ ပီပါ ၆ သိန်းခွဲလောက်အထိ မြင့်တက်နေတာပါ။
လောင်းလုံးမြို့နယ်အတွင်း မနှစ်က စပါးပေါ်ချိန် နိုဝင်ဘာလကုန်လောက်မှာ ဒေသခံ လယ်သမားအများစု စိုက်ပျိုးလေ့ရှိတဲ့ ကောက်ကြီးစပါး ၁ တင်းစျေးနှုန်း ၆ ထောင် ဝန်းကျင်သာရှိခဲ့ပေမယ့် ဒီနှစ်မှာတော့ ၁၂,၀၀၀ လောက်အထိ ရှိနေပါတယ်။
အရင်နှစ်ကထက် စပါးစျေးကောင်းလာပေမဲ့ ရိတ်သိမ်းခ နှစ်ဆလောက်တက်တဲ့အပြင် အလုပ်သမားခ၊ စပါးသယ်ယူ စရိတ်တွေ၊ ဓာတ်မြေသြဇာစျေးနှုန်းတွေပါ မြင့်တက်လာတာ ကြောင့် တွက်ချေမကိုက်ကြဘူးလို့ ဒေသခံလယ်သမား တဦးက ပြောပါတယ်။
လောင်းလုံးမြို့နယ်ထဲက ဒေသခံလယ်သမားတွေဟာ စပါးကိုသာ အဓိကထားစိုက်ပျိုးကြပြီး စပါးရိတ်စက်နဲ့ စပါးရိတ်သိမ်းကြသလို လက်နဲ့ ရိတ်သိမ်းကြတာတွေလည်း ရှိပါတယ်။
