စစ်ကိုင်းတိုင်း၊ တန့်ဆည်နဲ့ ချောင်ဦးမြို့နယ်တို့မှာ စစ်ကောင်စီတပ်နဲ့ ပျူစောထီးတို့ကို တိုက်ခိုက်ခဲ့ပြီး လက်နက်ခဲယမ်းတချို့သိမ်းဆည်းရမိတယ်လို့  ဒေသဆိုင်ရာပြည်သူ့ကာကွယ်ရေးတပ်တွေက ပြောပါတယ်။

ရွှေဘိုခရိုင် တပ်ရင်း ၂၅ နဲ့ တန့်ဆည် ပကဖ တို့ပူးပေါင်းထားတဲ့ ရန်သူ့​​သေနတ်ရရှိရေးလှုပ်ရှားမှုကို တန့်ဆည်မြို့ပေါ်မှာ ဒီဇင်ဘာ ၁ ရက်က ပြုလုပ်ခဲ့ရာမှာ ကာဘိုင်သေနတ် တလက်၊ ဆိုင်ကယ်နှစ်စီးနဲ့လာတဲ့ ပျူစောထီးနှစ်ယောက်ကို ကျွဲဆွဲစာသင်ကျောင်းနားက ကန်ဘောင်မှာ အနီးကပ် ပစ်ခတ်တိုက်ခိုက်ခဲ့တယ်လို့ ရွှေဘိုခရိုင် တပ်ရင်း ၂၅ က ထုတ်ပြန်ထားပါတယ်။

ပျူစောထီး တယောက်ဟာ အခင်းဖြစ်ပွားရာနေရာမှာ ပွဲချင်းပြီးသေဆုံးခဲ့ပေမဲ့ နောက်တယောက်ကတော့ ဒဏ်ရာအပြင်းအထန်နဲ့ ထွက်ပြေးသွားခဲ့ပြီး ပိတောက်ဝါ စတိုးဆိုင်နားမှာ သေဆုံးသွား​တယ်လို့ ဆိုပါတယ်။ 

ကာဘိုင်သေနတ်က ဒဏ်ရာရသူက ယူသွားပြီး ဖွက်ခဲ့လို့ ကာဘိုင် ကျည်ဘောက်တခုနဲ့ ကျည် ၁၄ တောင့်ပဲ ရခဲ့တယ်လို့လည်း ဆိုပါတယ်။

သေဆုံးသွားသူတွေဟာ  အကုက္ကားကျေးရွာမှာ နေထိုင်တဲ့ မျိုးထွန်းနဲ့ ဉာဏ်သီးတို့ဖြစ်တယ်လို့လည်း ထုတ်ပြန်ထားပါတယ်။

ချောင်းဦးမြို့နယ်မှာတော့ ကင်မွန်းတော်ရွာကနေ မနေ့မနက်ပိုင်းက ထွက်လာတဲ့ ပျူစောထီး ၃ ယောက်ကို Aung San Force မုံရွာခရိုင် အမှတ် (၅) တပ်ရင်း၊ တပ်ခွဲ (၃)၊ တပ်စု (၁) က ရှေ့ထွက်မိုင်းတလုံးနဲ့ မိုင်းဆွဲတိုက်ခိုက်ခဲ့တာပါ။

ဒါကြောင့် ပျူစောထီး တယောက် နေရာမှာပဲ သေဆုံးခဲ့ပြီး ကျန် နှစ်ယောက်ကတော့ ဒဏ်ရာနည်းနည်းနဲ့ ထွက်ပြေးသွားတယ်လို့ Aung San Force - A.S.F ရဲ့ သတင်းနဲ့ပြန်ကြားရေးမှတ်တမ်းရုံးက ထုတ်ပြန်ပါတယ်။