ချင်းတွင်းမြစ်ကြောင်းအတိုင်း  မုံရွာမြို့ကို ဆန်တက်လာတဲ့ စစ်ကောင်စီတပ်ရဲ့ လောင်စာဆီနဲ့ ရိက္ခာတင်‌လာတဲ့ ရေယာဉ်တွေကို ဒေသကာကွယ်ရေးပူးပေါင်းတပ်က ပစ်ခတ်တိုက်ခိုက်ရာမှာ သင်္ဘော တစင်း ထိမှန်သွားတယ်လို့ ချင်းတွင်းရိုးမတပ်ပေါင်းစုကနေ သိရပါတယ်။

နိုဝင်ဘာ ၂၈ ရက် မနက် ၉ နာရီလောက်က မြစ်ကြောင်းအတိုင်းဆန်တက်လာတဲ့ ရေယာဉ် ၇ စင်း ကို မုံရွာမြို့ မရောက်ခင် လက်နက်ကြီး၊ လက်နက်ငယ်တွေနဲ့ ပစ်ခတ်တိုက်ခိုက်ခဲ့တာလို့ ဆိုပါတယ်။

ချင်းတွင်းရိုးမတပ်ပေါင်းစုမှ တာဝန်ရှိသူ တဦးက  "လေယာဉ်ဆီနဲ့ ရိက္ခာတင်လာတဲ့ ရေယာဉ် အုပ်စုပါ။ အရင်ရက်က ဆင်ဖြူရှင်တံတားနားမှာ ရေယာဉ် ၂ စင်းက သူ့ အလိုလို နစ်သွားခဲ့တာ။ ကျန်တဲ့ ရေယာဉ်တွေက ဆက်ပြီး ဆန်တက်လာတာပါ။ အဲဒါကို မုံရွာမရောက်ခင် တော်လှန်ရေး တပ်ဖွဲ့ပေါင်းစုံက ဖြတ်တိုက်တာ။ ရေယာဉ်သင်္ဘော ၁ စင်း အင်ဂျင်ပိုင်းထိသွားတယ်"လို့ ပြောပါတယ်။

မြစ်ကြောင်းအတွင်း တိုက်ခိုက်မှုမှာပါဝင်ခဲ့တဲ့ ဒေသကာကွယ်ရေးတပ်ဖွဲ့ Monywa Revolation Force (MRF)ကလည်း   မော်တော် ၇ စီးကို ချင်းတွင်းမြစ်ကမ်းနံဘေး တနေရာမှာ  Monywa Revolution Force - MRF  အဖွဲ့နဲ့ မုံရွာခရိုင်တပ်ရင်း-၅ Aung San Force-ASF မဟာမိတ် ညီနောင်တွေက လက်နက်ကြီး၊ လက်နက်ငယ်တွေနဲ့ အပြန်အလှန် ပစ်ခတ် တိုက်ခိုက်ခဲ့ပြီး စခ သင်္ဘော တစီးထိမှန်ကာ မီးခိုး အူထွက်သွားပေမဲ့ အကျဆုံးစာရင်း‌ကိုတော့ မသိရှိရသေးပါလို့ ထုတ်ပြန်ထားပါတယ်။

တော်လှန်ရေးတပ်ဖွဲ့ပေါင်းစုံက ကြားဖြတ်တိုက်ခိုက်ရာမှာ အပြန်လှန်ပစ်ခတ်ခဲ့တယ်လို့ သိရပြီး မုံရွာမြို့ ကျောက်ဆောင်ဆိပ်ကမ်းကို မနက် ၁၁ နာရီခွဲမှာ ရေယာဉ် ၆ စင်း ဆိုက်ရောက် လာခဲ့တယ်လို့ သိရပါတယ်။

ကျောက်ဆောင်ဆိပ်ကမ်း ရောက်ချိန်မှာတော့ လူနာတင်ယာဉ် ၃ စင်းနဲ့ ထိခိုက်ဒဏ်ရာရသူတွေ၊ သေဆုံးသူ တချို့ကို သယ်ဆောင်သွားကြတယ်လို့ ‌သိရပါတယ်။

နိုဝင်ဘာ ၂၈ ရက် မနက် ၉ နာရီ‌လောက်က  မင်းကင်းမြို့နယ် တောင်တွင်းဒေသ၊ မအူကျေးရွာနား မှာ မိုင်းလာဖြုတ်တဲ့ စစ်ကောင်စီတပ်နဲ့ပျူစောထီးပူးပေါင်းအဖွဲ့ကို စနိုက်ပါနဲ့ ပစ်ခတ် တိုက်ခိုက်ရာမှာ ၁ ဦးသေဆုံးတယ်လို့ မင်းကင်း PDF က ပြောပါတယ်။

မအူကျေးရွာနားမှာ ‌အသင့်‌ထောင်ထားတဲ့မိုင်းကို  ပျူစောထီး ၂ ယောက်နဲ့ စစ်ကောင်စီတပ်ဖွဲ့ဝင် ၁၀ ယောက်တို့ ဖြုတ်ဖို့ လုပ်နေချိန် စနိုက်ပါနဲ့  ပစ်ခတ်ခဲ့တာလို့ မင်းကင်း PDF ( Minkin People's Defence Force -MKPDF 2 ) မှ တာဝန်ရှိသူ တဦးက ပြောပါတယ်။

"စစ်တပ်က သူတို့သင်တန်းပေးထားတဲ့ ဒေသခံပျူတွေနဲ့ ပေါင်းပြီး မအူရွာမှာ အထိုင်ချထားတာ။ သူတို့အဖွဲ့ ကင်းပတ်လာတော့ ထောင်ထားတဲ့ မိုင်းကို တွေ့ပြီး ဖြုတ်ဖို့လုပ်နေတုန်းမှာ စနိုက်ပါနဲ့ ၃ ပစ်တာ နေရာမှာ ၁ ယောက် သေတယ်။ သူတို့လည်း ပစ်ခံရပြီး ရွာထဲပြန်ဆုတ်သွားတယ် " 

အဲဒီနောက် စစ်တပ်က မအူကျေးရွာထဲကနေ လက်နက်ငယ်တွေနဲ့ နာရီဝက်ခန့်ကြာ ပစ်ခတ်ခဲ့ပြီး မင်းကင်း PDF ကလည်း ၄၀ မမဗုံးသီး ၂ လုံးနဲ့ ပြန်လည်ပစ်ခတ်ခဲ့တယ်လို့ ဆိုပါတယ်။

နိုဝင်ဘာ ၂၇ ရက်ကလည်း တောင်တွင်းဒေသ ပျားသုံးရွာမှာ ပျူစောထီးတွေပါတဲ့ စစ်ကောင်စီ ပူးပေါင်းအဖွဲ့နဲ့ ဒေသကာကွယ်ရေးတပ်ဖွဲ့ကြား တိုက်ပွဲဖြစ်ပွားခဲ့ပါတယ်။