ရခိုင်ပြည်နယ် မောင်တောခရိုင်အထွေထွေအုပ်ချုပ်ရေးဦးစီးဌာန ရုံးစာရေး တယောက်ကို နိုဝင်ဘာ ၂၆ ရက် မနက်ပိုင်းမှာ ရဲတပ်ဖွဲ့က ဖမ်းဆီးသွားခဲ့ပြီး မြို့ထဲရှိ လူနေအိမ်တချို့ကိုလည်း ဝင်ရောက် စစ်ဆေးခဲ့တယ်လို့ မောင်တောဒေသခံတွေက ပြောပါတယ်။
မျက်မြင်ဒေသခံတဦးက "ခရိုင်ရဲမှူး ကိုယ်တိုင်ဦးစီးပြီး ရဲတပ်ဖွဲဝင် ၂၀ ကျော်လောက်နဲ့ မနက် ၇ နာရီကျော်မှာ သူနေ့အိမ်ကို ဝိုင်းပြီး ဖမ်းသွားတာ။ ဘာကြောင့် ဖမ်းလဲတော့ မသိဘူး။ ဖမ်းခံရတဲ့သူက ခရိုင်ထွေ/အုပ် စာရေးပါ" လို့ ပြောပါတယ်။
ဖမ်းဆီးခံရသူဟာ အမှတ် ၃ ရပ်ကွက်၊ မြို့ဦးရွာနေ ကိုစိုးသီဟအောင် ဖြစ်တယ်လို့ သိရပါတယ်။
မောင်တောခရိုင်ရဲတပ်ဖွဲ့ ဒုရဲမှူး ကိုကိုလေး ဦးဆောင်တဲ့ ရဲတပ်ဖွဲ့ဝင်တွေဟာ တချိန်တည်းမှာ အမှတ် ၄ ရပ်ကွက်၊ ရွာသစ်ရွာနေ ဦးထွန်းလှချရဲ့နေအိမ်ကို ဝင်ရောက်ကာ သားဖြစ်သူ ကိုသားညီကိုလည်း ရှာဖွေခဲ့တယ်လို့ မျက်မြင်ဒေသခံတဦးက ပြောပါတယ်။
"အိမ်ကို ဝင်ရောက်စီးနင်း ရှာဖွေတာ။ လူကိုတော့ မတွေ့သွားကြဘူး။ ဘယ်လိုကြောင့် လိုက်ရှာလဲတော့ မသိဘူး။”
လက်ရှိအခြေအနေအရ စစ်ကောင်စီဟာ ရခိုင်ပြည်နယ်က မြို့နယ်အားလုံးမှာ ရက္ခိုင်တပ်တော် အေအေ နဲ့ ဆက်စပ်သူတွေ၊ ထောက်ပံ့ပေးသူတွေကို အထူးစစ်ဆေးဖော်ထုတ်ဖမ်းဆီးနေပါတယ်။
