တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်မှာ ပြည်သူ့ကာကွယ်ရေးတပ်ဖွဲ့နဲ့ စစ်ကောင်စီတပ်တို့ နိုဝင်ဘာ ၁၄ ရက်က တိုက်ပွဲ နှစ်ကြိမ်ဖြစ်ပွားခဲ့ပြီး စစ်ကောင်စီဘက်က ၉ ယောက် သေဆုံးပြီး ၆ ယောက် ဒဏ်ရာရရှိခဲ့သလို ပြည်သူ့ကာကွယ်ရေးရဲဘော်တယောက် ဒဏ်ရာရခဲ့တယ်လို့ PDF မြိတ်ခရိုင်တပ်ရင်း (၂) က ယနေ့ ထုတ်ပြန်ပါတယ်။
မနေ့မနက် ၆ နာရီလောက်က မော်တုန်းရွာအနောက်ဘက်ကမ်းမှာ ခမရ(၅၅၇/၅၅၈) စစ်ကောင်စီတပ်နဲ့ ပြည်သူ့ကာကွယ်ရေးပူးပေါင်းအဖွဲ့(မြိတ်ခရိုင်တပ်ရင်း(၂)၊ တပ်ခွဲ(၂)၊ တနင်္သာရီ ကာကွယ်ရေးပြောက်ကျားအဖွဲ့ (တနင်္သာရီရိုးမအဖွဲ့)တို့ ၃ နာရီကြာ တိုက်ပွဲဖြစ်ပွားခဲ့တာပါ။
မနေ့ မနက် ၈ နာရီလောက်မှာလည်း တနင်္သာရီမြို့အဝင် ဗောဓိကမ်းတံတားအနီးရှိ စစ်ကောင်စီတပ် ကင်းစခန်းကို ပြည်သူ့ကာကွယ်ရေးပူးပေါင်းတပ်(မြိတ်ခရိုင်တပ်ရင်း ၂ - တပ်ခွဲ ၁ နဲ့ တနင်္သာရီမြို့နယ် မဟာမိတ်တပ်ပေါင်းစုအဖွဲ့) က သွားရောက်တိုက်ခိုက်ခဲ့ပါသေးတယ်။
မဟာမိတ်တပ်ပေါင်းစုမှ တာဝန်ရှိသူတစ်ဦးက “တံတားကင်းစခန်းကို ကျနော်တို့ဝင်တိုက်တော့ စောင့်နေတဲ့ ရဲနဲ့ စခ လေးယောက်က တနင်္သာရီမြို့ထဲ ပြေးဝင်သွားတယ်။ အဲဒီမှာ..မဟာမိတ်တွေက တံတားမှာ နေရာယူပြီး စခတွေနဲ့ တိုက်ပွဲဖြစ်ကြတာ။ ညနေလောက်မှာ စခတွေ..အင်းအား ၆၀ ကျော် စစ်ကူလာပြီး..တိုက်ပွဲထပ်ဖြစ်ကြတာ"လို့ ပြောပါတယ်။
ဒီတိုက်ပွဲမှာတော့ တနင်္သာရီမြို့ခံ ပြည်သူတယောက် သေဆုံးခဲ့သလို စစ်ကောင်စီဘက်က ၃ ယောက် သေဆုံးခဲ့ကာ ပြည်သူ့ကာကွယ်ရေးတပ်ဖွဲ့ကတော့ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။
အခုလအတွင်း တနင်္သာရီမြို့နယ်မှာ ပြည်သူ့ကာကွယ်ရေးတပ်ဖွဲ့တွေနဲ့ စစ်ကောင်စီတပ်တို့ တိုက်ပွဲတွေ ခပ်စိပ်စိပ်ဖြစ်ပွားနေပြီး ပြည်သူတွေ နေရပ်စွန့်ခွာထွက်ပြေးတိမ်းရှောင်နေရတဲ့အပြင် တိုက်ပွဲကြောင့် ပြည်သူတွေ ထိခိုက်သေဆုံးဒဏ်ရာရသူလည်း များလာပါတယ်။