စစ်ကိုင်းတိုင်း၊ မင်းကင်းမြို့နယ် ရှဲကျေးရွာနဲ့ သေမသောက်ကျေးရွာရှိ စစ်ကောင်စီတပ်နဲ့ ပျူစောထီးစခန်းကို နိုဝင်ဘာ ၁ ရက် မနက် ၅ နာရီလောက်မှာ ကျောင်းသားတော်လှန်ရေးတပ်ဖွဲ့ (Student's Revolutionary Force - SRF) က စီးနင်း တိုက်ခိုက်ခဲ့တယ်လို့ သိရပါတယ်။

တိုက်ပွဲမှာ မိနစ် ၃၀ လောက် ကြာမြင့်ခဲ့ပြီး စစ်ကောင်စီတပ်ဘက်က ၅ ယောက်သေဆုံးကာ ကာဘိုင် M2 အမျိုးအစား သေနတ် ၃ လက်ကိုလည်း သိမ်းယူရရှိခဲ့တယ်လို့ တော်လှန်ရေးတပ်ဖွဲ့က ဆိုပါတယ်။

ကျောင်းသားတော်လှန်ရေးတပ်ဖွဲ့မှ တာဝန်ရှိသူတယောက်က “စစ်ကောင်စီတပ်နဲ့ ပျူစောထီးအဖွဲ့တွေ အထိုင်ချထားတဲ့ ရွာက တပ်စခန်းကို ဝင်တိုက်တာပါ။ ရန်သူဘက်က ၅ ကောင်သေတာတော့ သေချာပေါက် အတည်ပြုနိုင်ပါတယ်။ စစ်ကောင်စီတပ်ဖွဲ့က ပျူအဖွဲ့ဝင်တွေကို လက်နက်ကိုယ်စီ တပ်ဆင်ပေးထားတာ။ အဲ့ဒီမှာ သေတဲ့ကောင်တွေဆီက ကာဘိုင် ၃ လက်ကိုတော့ သိမ်းယူနိုင်ခဲ့တယ်။ သူတို့ဘက်ကလည်း လက်နက်ကြီးတွေနဲ့ ပြန်ပြီး ပစ်ခတ်တာရှိတယ်” လို့ ပြောပါတယ်။

အဲ့ဒီတိုက်ပွဲမှာ ကျောင်းသားတော်လှန်ရေးတပ်ဖွဲ့ (SRF) မှ တပ်ရင်း-၁ နဲ့ တပ်ရင်း-၄ တို့ ပူးပေါင်းတိုက်ခိုက်ခဲ့တာဖြစ်ပြီး တော်လှန်ရေးတပ်ဖွဲ့ဘက်က ရဲဘော် ၂ ယောက် လက်မောင်းနဲ့ ပခုံးတို့မှာ မစိုးရိမ်ရ ဒဏ်ရာကိုယ်စီ ရရှိခဲ့တယ်လို့ သိရပါတယ်။

မင်းကင်းမြို့နယ်မှာ စစ်ကောင်စီတပ်ဖွဲ့နဲ့ ပျူစောထီးအဖွဲ့တွေဟာ ဒေသတွင်းရှိ ကျေးရွာတွေကို အထိုင်ချ တပ်စွဲကာ သူတို့ကို ထောက်ခံသူတွေကို အင်အားအသစ်အဖြစ် စုဆောင်းတာတွေနဲ့ အခြေခံစစ်သင်တန်းပေးပြီး လက်နက်တပ်ဆင်ပေးတာတွေလည်း ပြုလုပ်နေပါတယ်။

အလားတူ စစ်ကိုင်းတိုင်း၊ ကလေးမြို့မြောက်ဘက်အထွက် ကလေး-ကလေးဝ ကားလမ်းမပေါ် ဖောင်ကူးတံတားအနီးမှာ အောက်တိုဘာ ၃၁ ရက် မနက်ပိုင်းက ကလေး PDF အဖွဲ့ဝင်တွေက စစ်ကောင်စီစစ်ကား ၂ စီးကို မိုင်းဆွဲတိုက်ခိုက်ခဲ့တယ်လို့ သိရပါတယ်။

ကလေးမြို့ဘက်ကနေ မြောက်ပိုင်းဘက် ထွက်လာတဲ့ စစ်ကား ၂ စီးကို ကလေး PDF အဖွဲ့ဝင်‌တွေက အသင့်တပ်ဆင်ထားတဲ့ မိုင်း ၃ လုံးဆွဲပြီး တိုက်ခိုက်ခဲ့ရာ စစ်ကားတစီး လမ်းဘေးထိုးကျသွားကာ ကားပေါ်ပါ စစ်ကောင်စီတပ်သားတွေ ထိခိုက်ကျဆုံးမှုရှိနိုင်ပြီး မိမိတို့ အဖွဲ့ဝင်တွေအနေနဲ့ ထိခိုက်ကျဆုံးမှု မရှိဘူးလို့ ကလေး PDF က ထုတ်ပြန်ထားပါတယ်။

အဆိုပါ မိုင်းဆွဲတိုက်ခိုက်မှုကြောင့် လမ်းသွာလမ်းလာ ခရီးသွား ဒေသခံအမျိုးသား ၂ ယောက် အပြင်းအထန် ထိခိုက်ဒဏ်ရာ ရရှိခဲ့တယ်လို့ စစ်ကောင်စီဘက်က သတင်းထုတ်ပြန်ထားသလို ဒေသခံတွေကလည်း ဒီဗွီဘီကို ပြောပါတယ်။

သုံးဘီးဆိုက်တွဲမောင်းနှင်လာတဲ့ ဦးကျော်စိုးနဲ့ သုံးဘီးပေါ် စီးနင်းလိုက်ပါလာတဲ့ ဦးယုန္ဒာကျော်တို့ ၂ ယောက် မိုင်းစထိမှန်ပြီး အပြင်းအထန် ဒဏ်ရာရရှိကာ ကလေးပြည်သူ့ဆေးရုံကို ပို့ဆောင်ထားရတယ်လို့ ဆိုပါတယ်။

ကလေး PDF အဖွဲ့ဝင်တွေက စစ်ကောင်စီဘက်က ထိခိုက်ကျဆုံးမှု ရှိနိုင်တယ်လို့ ဆိုပေမဲ့ စစ်ကောင်စီဘက်က သတင်းထုတ်ပြန်ထားတာ မရှိသေးသလို ကလေး PDF အဖွဲ့ဝင်တွေ အနေနဲ့လည်း မိုင်းစထိမှန်ထားတဲ့‌ အမျိုးသား ၂ ယောက်အတွက် ဘယ်လိုတာဝန်ယူ ဖြေရှင်းသွားမယ် ဆိုတာကိုတော့‌ ထုတ်ပြန်ပြောကြားတာ မရှိသေးပါဘူး။