ကယား(ကရင်နီ)ပြည်နယ်၊ ဒီးမော့ဆိုမြို့နယ်မှာ လက်နက်ကြီး ထိမှန်ပြီး ကျဆုံးသွားတဲ့ ဒီးမော့ဆိုပြည်သူ့ကာကွယ်ရေးတပ် DMO-PDF တပ်ရင်း D မှ ရဲဘော် ဦးသွယ်မိုးကို အောက်တိုဘာ ၂၉ ရက်က ကက်သလစ်ထုံးတမ်းစဉ်လာနဲ့အညီ မြေမြှုပ်သင်္ဂြိုဟ်ခဲ့တယ်လို့ DMO-PDF က ထုတ်ပြန်ပါတယ်။

ဦးသွယ်မိုးဟာ အောက်တိုဘာ ၂၇ ရက်က ဒီးမော့ဆိုမြို့နယ်အတွင်း နယ်မြေရှင်းလင်းရေး လုပ်နေစဉ် စစ်ကောင်စီ ပစ်ခတ်လိုက်တဲ့ လက်နက်ကြီး ထိမှန်ကျဆုံးခဲ့တာဖြစ်ပြီး ဦးသွယ်မိုးနဲ့ အတူ တပ်ရင်း C မှ ရဲဘော်တယောက် ဒဏ်ရာပြင်းထန်ရရှိပြီး ရဲဘော် ၄ ယောက် အသေးစား ဒဏ်ရာရခဲ့တယ်လို့ သိရပါတယ်။ 

တာဝန်ထမ်းဆောင်ရင်း ကျဆုံးသွားတဲ့ ဦးသွယ်မိုးကို ဖယ်ဒရယ်ဒီမိုကရေစီ သူရဲကောင်းအဖြစ် မှတ်တမ်းတင် ဂုဏ်ပြုသွားမယ်လို့ DMO - PDF က ပြောထားပါတယ်။

အောက်တိုဘာ ၂၀ ကလည်း နယ်မြေရှင်းလင်းရေးပြုလုပ်ရင်း စစ်ကောင်စီထောင်ထားတဲ့ မိုင်းနင်းမိပြီး DMO -PDF တပ်ရင်း G မှ ရဲဘော်တယောက် ခြေနှစ်ဘက်ပြတ် ဒဏ်ရာနဲ့ ပွဲချင်းပြီး သေဆုံးခဲ့ပါတယ်။