မကွေးတိုင်း၊ မြိုင်မြို့နယ်မှာ  ပြည်သူတွေရဲ့ ငွေကြေးနဲ့ ပစ္စည်းတွေကို စစ်ကောင်စီစစ်ကြောင်းက လုယက်ခိုးယူပြီး FAW ကားနှစ်စီးနဲ့ အဓမ္မသယ်ဆောင်သွားကြတယ်လို့ ဒေသခံတွေက ပြောပါတယ်။

အောက်တိုဘာ ၂၅ ရက် မနက် ၈ နာရီလောက်က စစ်ကောင်စီတပ်အင်အား ၁၀၀ ကျော်ပါ စစ်ကြောင်းဟာ မြိုင်မြို့နယ် စိုတောကျေးရွာကို သေနတ်တွေနဲ့ ပစ်ခတ်ဝင်ရောက်ကာ ပြည်သူတွေရဲ့နေအိမ်တွေကို မွှေနှောက်ပြီး အဖိုးတန်ပစ္စည်းတွေ၊ ငွေကြေးတွေနဲ့ ကုန်ပစ္စည်းတွေကို လုက်ယက်အဓမ္မမယူဆောင်ပြီး ညနေ ၃ နာရီလောက် ပြန်ထွက်သွားတယ်လို့ စိုတောကျေးရွာဒေသခံတယောက်က ပြောပါတယ်။

စိုတောကျေးရွာမှာ အိမ်ခြေ ၁၄၀ ကျော်လောက်ရှိပြီး စစ်ကောင်စီတပ်တွေက တအိမ်တက်ဆင်းမွှေနှောက်ပြီးသူတို့လိုချင်တဲ့ ပစ္စည်တွေကို အကုန်ယူသွားကာ  မြေရင့် ကျေးရွာကိုဆက်လက်သွားရောက်က သေနတ်တွေပစ်ဖောက်ပြီး ဝင်မွှေနေကြတယ်လို့ ဆိုပါတယ်။

ရွာသားတွေကတော့ စစ်ကြောင်းထိုးလာလို့ ဘေးလွတ်ရာနေရာကို ထွက်ပြေးနေကြရပြီး ပန်တိုင်းတောရွာနဲ့မင်းဂံရွာက လေဖြတ်ရောဂါသည် အမျိုးသား  နှစ်ယောက်သေဆုံးခဲ့ရပါတယ်။

အောက်တိုဘာလ ၂၂ ရက်နေ့မှာ ပန်းတိုင်းတောရွာ ဒေသခံပြည်သူ ၄ ယောက် ဖမ်းဆီးခံရကာ ၃ ယောက်ပြန်လွတ်လာပေမယ့် အသက် ၅၀ ကျော်အရွယ် ဦးမြဝေကတော့ ပြန်မလွတ်သေးဘဲ ပျောက်ဆုံးနေပါတယ်။

မြိုင်မြို့နယ်မှာစစ်ကောင်စီစစ်ကြောင်း ၃ ကြောင်းလောက် ဝင်ရောက်နေတဲ့အတွက်  ဒေသခံ ပြည်သူ ၆၀၀၀ ကျော်လောက် စစ်ဘေးရှောင်နေကြရပြီး  စားနပ်ရိက္ခာ၊ ဆေးဝါး၊ အဝတ်ထည်၊ စောင်၊ ခြင်ထောင်၊ အမိုးအကာနဲ့ ကျန်းမာရေးစောင့်ရှောက်မှုတွေ အရေးပေါ်အကူညီ လိုအပ်နေတယ်လို့ သိရပါတယ်။