တနင်္သာရီတိုင်း၊ ထားဝယ်မြို့ ပြည်သူ့ဆေးရုံကြီးမှာ တက်ရောက်ကုသနေတဲ့ ကိုဗစ်-၁၉ လူနာ ၇ ယောက် ရက်ပိုင်းအတွင်း ဆက်တိုက် သေဆုံးသွားတယ်လို့ နာရေးကူညီမှုအသင်း ထားဝယ်က သိရပါတယ်။

အောက်တိုဘာ ၂၀ ရက်နဲ့ ၂၁ ရက်တွေမှာ ရေဖြူမြို့နယ်က အသက် ၈၀ ကျော် အဘွားအိုတယောက်၊ အသက် ၇၀ ကျော် အဘိုးအိုတယောက်နဲ့ ထားဝယ်မြို့နယ်က အသက် ၆၀ ကျော် အမျိုးသမီးကြီးတယောက်တို့  ကိုဗစ်-၁၉ ရောဂါနဲ့ ကွယ်လွန်ခဲ့ပါတယ်။

အောက်တိုဘာလ ၂၂ ရက်မှာလည်း ထားဝယ်မြို့နယ်က အသက် ၉၀ ကျော်  အဘိုးအိုတယောက်နဲ့ ရေဖြူမြို့နယ်က ၆ လသားအရွယ် ကလေးငယ်တယောက် ကိုဗစ်နဲ့ ကွယ်လွန်ခဲ့ ပါတယ်။

အောက်တိုဘာ ၂၃ ရက်မှာလည်း ထားဝယ်ဆေးရုံကြီးမှာ ကိုဗစ်ကူးစက်ခံရပြီး သေဆုံးသူ နှစ် ယောက် ရှိနေတယ်လို့ နာရေးကူညီမှု-ထားဝယ်ထံက သိရပါတယ်။

ထားဝယ်မှာ အောက်တိုဘာ ၄ ရက်ကလည်း ၄ နှစ်အရွယ် ကလေးတယောက် သေဆုံးခဲ့တာကြောင့် အခုသေဆုံးတဲ့ ၇ ယောက်နဲ့ဆိုပါက  တလအတွင်း စုစုပေါင်း သေဆုံးသူ ၈ ယောက်အထိ ရှိလာပြီဖြစ်ပါတယ်။

အခုလိုသေဆုံးမှုနှုန်းနဲ့ ကူးစက်နှုန်းတွေ မြင့်တက်လာနေတာကြောင့် ဒေသခံပြည်သူတွေအနေနဲ့ နှာခေါင်းစည်း MASK ပြန်တပ်ကြဖို့ နာရေးကူညီမှု - ထားဝယ် အသင်းက တိုက်တွန်းထားပါတယ်။ 

ဒီလို ကူးစက်နှုန်းနဲ့ သေဆုံးနှုန်းမြင့်တက်နေတဲ့ ထားဝယ်ခရိုင်မှာ ကျန်းမာရေးဆိုင်ရာ ကန့်သတ်ချက် တစုံတရာ ထုတ်ပြန်ထားတာ မတွေ့ရသလို ပွင့်လင်းရာသီ ဖြစ်တာကြောင့် အလှူပွဲ ၊ မင်္ဂလာပွဲတွေနဲ့ လူစုလူဝေးတွေ ဖြစ်နေတယ်လို့ ဒေသခံတွေကပြောပါတယ်။

စစ်ကောင်စီကိုယ်တိုင်ကလည်း ထားဝယ်မြို့အပါအဝင် ကျန်မြို့နယ်တွေမှာ ကိုဗစ်ကြောင့် ရပ်နားထားတဲ့ ဌာနာဆိုင်ရာဝန်ထမ်းပေါင်းစုံဘုံကထိန်ကို အခုနှစ်မှာ စည်စည်ကားကား ပြန်လည် ကျင်းပဖို့ အစည်းအဝေးတွေ ပြုလုပ်နေပါတယ်။