မကွေးတိုင်း၊ ထီးလင်းမြို့နယ်မှာ ကျေးရွာတွေကို စစ်ကောင်စီတပ်က ပြီးခဲ့တဲ့သီတင်းပတ်ကစပြီး နယ်မြေရှင်းလင်း‌ရေးအ‌‌ကြောင်းပြကာ ထိုးစစ်ဆင်နေတာကြောင့် ရွာသူရွာသားတွေ ထောင်နဲ့ချီ ထွက်ပြေးနေကြရတယ်လို့ ဒေသခံတွေက ပြောပါတယ်။

ဂန့်ဂေါမြို့ ခလရ ၅၀ က စစ်ကောင်စီတပ်သားတွေနဲ့ ပျူစောထီးအဖွဲ့ဝင်တွေဟာ ထီးလင်းနယ်က အနောက်ဘက်ကျေးရွာကို ရောက်ရှိနေပြီး ထန်းပင်ကုန်းကျေးရွာ၊ ထလင်းကျေးရွာနဲ့ တောယောင်း ကျေးရွာတွေက ဒေသခံ ၃၀၀၀‌ ကျော်ဟာ ဘေးလွတ်ရာ တောတောင်ဒေသတွေကို ထွက်ပြေး နေကြရတာဖြစ်ပါတယ်။

ဒေသခံတဦးက "သူတို့က အမြဲစစ်ကြောင်းထိုးနေတာ။ အနောက်ဘက်ရွာကို ဒီလတလတည်း စစ်ကြောင်းထိုးတာ ၄ ကြိမ် ရှိပြီ။ နေအိမ်တွေလည်း မီးရှို့ ခံထားကြရတာ။ လက်ရှိမှာလည်း ပြေးနေ ကြရတယ်။ နေထိုင်စားသောက်ဖို့ အခက်တွေ့နေတယ်။ စားနပ်ရိက္ခာကတော့ လိုအပ်တယ်။"လို့ ပြောပါတယ်။

လက်ရှိမှာ ဒေသခံတွေအနေနဲ့ စားနပ်ရိက္ခာအခက်အခဲတွေနဲ့ ရင်ဆိုင်နေရတာကြောင့် ကူညီပေးကြဖို့ ‌YDF တပ်ဖွဲ့ဝင် တဦးက ပြောပါတယ်။

စစ်ကိုင်းတိုင်း ယင်းမာပင်မြို့နယ်မှာလည်း အောက်တိုဘာ ၁၅ ရက်ညပိုင်း ၇ လောက်က စစ်ကောင်စီတပ်ဖွဲ့တွေရဲ့ လက်နက်ကြီးပစ်ခတ်မှုတွေကြောင့် ဒေသခံတချို့ ဒဏ်ရာရရှိခဲ့သလို အိမ်မွေးတိရစ္ဆာန်တချို့လည်း ဒဏ်ရာရရှိခဲ့တယ်လို့ ဒေသခံတွေက ပြောပါတယ်။

စစ်ကောင်စီတပ်ရဲ့ ပစ်ခတ်မှုကြောင့် မြို့ပေါ်ကျေးရွာသား ကိုဝင်းနိုင်ဟာ လက်ဖျံမှာ ဒဏ်ရာရသွားသလို  မပေါပေါကတော့  တင်ပါး၊ ပေါင်၊ ဖနောင့်တို့ ထိမှန်ဒဏ်ရာရသွားခဲ့တာပါ။

ဒါ့အပြင်  အိမ်မွေးနွား ၅ ကောင်ဟာလည်း လက်နက်ကြီးစ ထိမှန်ခံခဲ့ရပြီး နွား ၂ ကောင်ကတော့ ပြင်းထန်ဒဏ်ရာရရှိခဲ့တယ်လို့ ဒေသခံတဦးက ပြောပါတယ်။

လက်နက်ကြီးစ ထိမှန်ခံခဲ့ရသူ ၂ ဦးကို ညတွင်းချင်းဆေးကုသမှုပေးနိုင်ခဲ့ပေမယ့် အိမ်မွေးနွား ၅ ကောင်ကတော့ နားလည်တတ်ကျွမ်းတဲ့ တိ/မွေးကု ဆရာဝန်ရှာပြီး ကုသမှုပေးနိုင်ဖို့လုပ်ဆောင်နေတယ်လို့ ပရဟိတဆောင်ရွက်ပေးနေသူတဦးက ပြောပါတယ်။

စစ်ကောင်စီတပ်ဖွဲ့ဟာ တခြားကျေးရွာတွေဘက်တွေကိုလည်း အချိန်အတော်ကြာအောင် လက်နက်ကြီးတွေနဲ့ ပစ်ခတ်ခဲ့ကြတယ်လို့ ရွာသားတွေက ပြောပါတယ်။