မကွေးတိုင်း၊ ပခုက္ကူမြို့မှာ အောက်တိုဘာ ၉ ရက် ညနေပိုင်းက ခရီးသွား လူငယ်တယောက်ကို စစ်ကောင်စီတပ်က  PDF လို့ စွပ်စွဲပြီး ဖမ်းဆီးသွားတယ်လို့  မြို့ခံတယောက်က ပြောပါတယ်။

ရှားတောရွာက အသက် ၂၀ အရွယ် ကိုစောသီဟကို မနေ့က ညနေ ၄ နာရီလောက်က ပခုက္ကူုမြို့ အမှတ် ၁၁ ရပ်ကွက်မှာ စစ်ကောင်စီတပ်တွေနဲ့ အပေါင်းပါတွေက PDF လို့ စွပ်စွဲပြီး စောင့်ဆိုင်း ဖမ်းဆီးခဲ့တာလို့ သိရပါတယ်။

သီတင်းကျွတ်လပြည့်နေ့မှာ ပခုက္ကူမြို့ကို ဘုရားဖူးလာရောက်ကာ သူငယ်ချင်းတွေဆီကို လျှောက်လည်ရင်း တယောက်တည်း ရှိနေချိန် ဖမ်းဆီးခံလိုက်ရပြီး ပခုက္ကူမြို့မရဲစခန်းကို ခေါ်ဆောင် သွားတယ်လို့ ဆိုပါတယ်။

စစ်ကောင်စီတပ်နဲ့အပေါင်းပါတွေဟာ ဒေသခံတွေနဲ့ NLD ပါတီထောက်ခံဝန်းရံသူတွေကို PDFတပ်ဖွဲ့ဝင် ၊ PDFထောက်ပံ့သူ၊ မမှန်သတင်းရေးသားဖြန့်ဝေသူလို့ ခေါင်းစဥ် အမျိုးမျိုး တပ်ပြီး ဖမ်းဆီးနေတယ်လို့ ဒေသခံတွေက ပြောပါတယ်။

နိုင်ငံတော်အာဏာကို စစ်တပ်က တရားမဝင်သိမ်းတဲ့ ဖေဖော်ဝါရီ ၁ ရက်ကနေ အောက်တိုဘာ ၇ ရက်အထိ နိုင်ငံတဝန်း  မတရားဖမ်းဆီးချုပ်နှောင်ခံထားရသူ ၁၂၅၈၆ ယောက်အနက် ၁၅၀၈ ယောက် ထောင်ဒဏ်ချခံထားရတယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း AAPP က အောက်တိုဘာ ၇ ရက်မှာ ထုတ်ပြန်ထားပါတယ်။