မြန်မာနိုင်ငံမှာ အာဏာသိမ်း ၁ နှစ်ခွဲကျော်အကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၂,၃၃၆ ယောက်နဲ့ ဖမ်းဆီးထိန်းသိမ်းခံရသူပေါင်း ၁၅,၇၅၇ ယောက်ထိရှိပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။
ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၂ ခုနှစ်၊ အောက်တိုဘာ ၄ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြပါတယ်။
နွေဦးတော်လှန်ရေးကာလအတွင်း ဒီနေ့အထိ ၁၂,၅၆၃ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၁,၄၉၉ ယောက်ကတော့ ထောင်ဒဏ် ချမှတ်ခံထားရပါတယ်။
တော်လှန်ရေးနဲ့ ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူအရေတွက်ကတော့ ၈၄ ယောက်ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက်အပါအဝင် ၁၂၁ ယောက်ကတော့ မျက်ကွယ်ပြစ်ဒဏ်ချမှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်း ၁၂၆ ယောက် ရှိလာခဲ့ပြီဖြစ်ပါတယ်။
လတ်တလောအချိန်ထိ အာမခံနဲ့ လွတ်မြောက်သူ ၂၂ ယောက်ရှိပြီး ပြန်လည်လွတ်မြောက်လာသူဦးရေကတော့ ၃,၁၇၂ ယောက် ရှိခဲ့တယ်လို့ ဆိုပါတယ်။ ဒါ့အပြင် အေအေပီပီကနေ လက်လှမ်းမီသမျှ မှတ်တမ်း ပြုစုထားချက်အရ အာဏာသိမ်းချိန်ကနေ ပြီးခဲ့တဲ့ စက်တင်ဘာလကုန်ထိ အကြမ်းဖက်စစ်အုပ်စုက မတရားချိပ်ပိတ်သိမ်းဆည်းခဲ့တဲ့ နေအိမ်၊ အဆောက်အဦ အရေအတွက် စုစုပေါင်း ၇၈၀ ခုထက်မနည်း ရှိခဲ့ တယ်လို့ ဆိုပါတယ်။
ပြီးခဲ့တဲ့ အောက်တိုဘာ ၂ ရက်ည ၁၀ နာရီခွဲအချိန်က ကချင်ပြည်နယ်၊ ဖားကန့်မြို့နယ်၊ ကလပ်ကုန်းရပ်ကွက်ရှိ ဆုံဆည်းရာကုန်စုံဆိုင်အနီး ဆိုင်ကယ်မောင်းနှင်လာတဲ့ မရန်ဆိုင်းဂူကို အကြမ်းဖက်စစ်အုပ်စု တပ်နဲ့ ရဲတွေက ပစ်သတ်ခဲ့ပြီး အဲဒီညမှာပဲ ရုပ်အလောင်းကို ဆေးရုံကနေ ယူဆောင်သွားခဲ့တယ်လို့ သိရပါတယ်။ အကြမ်းဖက်စစ်အုပ်စုဟာ လမ်းသွားလမ်းလာတွေကို စစ်ဆေးချိန်မှာ မရန်ဆိုင်းဂူက ဆိုင်ကယ်ကို ရပ်တန့်မပေးတဲ့အတွက် ပစ်သတ်ခံခဲ့ရတာ ဖြစ်ပါတယ်။
ဒါ့အပြင် စက်တင်ဘာ ၂၉ ရက်မနက် ၈ နာရီလောက်ကလည်း ရှမ်းပြည်နယ်၊ အေးသာယာ-တောင်ကြီး အတက်လမ်းမှာ စိတ်ကျန်းမာရေး ကောင်းမွန်ခြင်းမရှိတဲ့ အမျိုးသား ၁ ယောက်ကို အကြမ်းဖက်စစ်အုပ်စု တပ်က ပစ်သတ်ခဲ့တယ်လို့ သိရပါတယ်။ အဆိုပါအမျိုးသားမှာ မကြာခဏ ကားကြုံ တားစီးလေ့ရှိသူဖြစ်ပြီး အဲဒီနေ့ကတော့ သူဟာ တောင်ကြီးမြို့ကို အလုပ်လုပ်ဖို့သွားချိန် စစ်အုပ်စုရဲ့ VIP ကားတန်း လာတဲ့အချိန် တားမိတဲ့အတွက် ပစ်သတ်ခံခဲ့ရတာလို့ ဆိုပါတယ်။ ဒါ့အပြင် သူ့ရဲ့ ရုပ်အလောင်းကိုလည်း စစ်သားတွေက ယူဆောင်သွားခဲ့တယ်လို့ သိရပါတယ်။
အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကိုသိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။
ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီး အချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။
