Home
မြန်မာသတင်း
လက်နက်နှင့်အတူ ပြည်သူ့ရင်ခွင်ခိုလှုံလာသည့် တပ်ကြပ်ကြီးကို ဆုကြေးငွေ ပေးအပ်
DVB
·
September 18, 2022

စစ်ကိုင်းတိုင်း ယင်းမာပင်ခရိုင် ယင်းမာပင်မြို့နယ်မှာ စစ်ကောင်စီကိုကျောခိုင်းစွန့်ခွာပြီး ပြည်သူ့ရင်ခွင်ခိုလှုံလာတဲ့ CDM စစ်သားကို ဆုကြေးငွေထောက်ပံ့ပေးအပ်ခဲ့တယ်လို့ အမိမြေ တော်လှန်ရေးတပ်ဖွဲ့ဝင်ရဲဘော်တွေက ပြောပါတယ်။

အမိမြေ တော်လှန်ရေးတပ်ဖွဲ့ထံ CDM ဝင်ရောက်လာတဲ့ စစ်ကောင်စီတပ်သားဟာ ဘန့်ဘွေးရွာမ(ဒေသခေါ် ပျူစောထီးရွာ)မှာ တပ်စွဲနေထိုင် တာဝန်ထမ်းဆောင်နေတဲ့ အနောက်မြောက်တိုင်းစစ်ဌာနချုပ်မှ တပ်ကြပ်ကြီးစာရေး မင်းသူ(ကိုယ်ပိုင်နံပါတ် ၃၄၅၁၇၁) ဖြစ်တယ်လို့ ဆိုပါတယ်။

တပ်ကြပ်ကြီး မင်းသူဟာ စက်တင်ဘာ ၁၀ ရက်နေ့က MA2 လက်နက် ၁ လက်၊ ကျည်ဘောက် ၄ ခုနဲ့ ကျည်ဆန် ၁၁၇ တောင့်နဲ့အတူ ပြည်သူ့ရင်ခွင်ခိုလှုံလာတာဖြစ်ပြီး ထောက်ပံ့ဆုကြေးငွေ သိန်း ၈၀ ပေးအပ်ချီးမြှင့်ခဲ့တယ်လို့ အမိမြေတပ်ဖွဲ့မှ ရဲဘော်မင်းကိုက ပြောပါတယ်။ 

‘"ကျနော်တို့မှာ သူ့ကိုထောက်ပံ့ပေးနိုင်ဖို့ ရန်ပုံငွေတပြားမှမရှိသေးဘူး။ အဲဒီကာလမျိုးမှာ ကျနော်တို့ ဘာလုပ်ရလဲဆိုရင် ပြည်သူ့ရင်ခွင်ကိုခိုလှုံလာတဲ့ စစ်သားကောင်းတယောက်ဖြစ်လို့ ထောက်ပံ့ကြေးပေးနိုင်အောင် ကျနော်တို့ရဲဘော်တွေရဲ့ ပစ္စည်းတချို့ကိုပေါင်နှံပြီးတော့ ထောက်ပံ့ကြေးပေးနိုင်အောင် သိန်း ၈၀ ကို စီစဥ်ခဲ့ရတာ။”

တပ်ကြပ်ကြီး မင်းသူဟာ စစ်ကောင်စီတပ်က အပြစ်မဲ့ပြည်သူတွေကို ဖမ်းဆီးနှိပ်စက်တာ၊ သတ်ဖြတ်တာ၊ မုဒိမ်းကျင့်တာတွေ ပြုလုပ်နေတာတွေကို လက်မခံနိုင်တာကြောင့် အခုလို လက်နက်နဲ့အတူ CDM ပြလုပ်လာတာလို့ ဆိုပါတယ်။ 

အခုတိုက်ပွဲဟာ နောက်ဆုံးပိတ်တိုက်ပွဲဖြစ်တာကြောင့် အသက်ပေးပြီး တော်လှန်သွားမှာဖြစ်ပြီး ပြည်သူ့ရင်ကို ခိုလှုံလာမယ့် စစ်သားကောင်းတွေကို နွေးနွေးထွေထွး ကြိုဆိုမယ်လို့လည်း အမိမြေ ရဲဘော်မင်းကိုက ပြောပါတယ်။

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024