မကွေးတိုင်း၊ ရေစ​ကြိုမြို့နယ်ထဲက ဂွေးချိုရွာ ဆည်ဘောင်ပေါ်ကို ကင်းပုန်းဝပ်ဖို့လာတဲ့ စစ်ကောင်စီတပ်ဖွဲ့ဝင် ၆ ယောက် စက်တင်ဘာ ၇ ရက် ည ၈ နာရီခွဲလောက်က မိုင်းဆွဲတိုက်ခိုက်ခံခဲ့ရပြီး ပျူစောထီးအဖွဲ့ဝင်နှစ်ယောက် သေဆုံးခဲ့တယ်လို့ Yesagyo Revolution Group အဖွဲ့သိရပါတယ်။

ဂွေးချိုကျေးရွာဟာ ပျူစောထီးတွေနေထိုင်တဲ့ရွာဖြစ်ပြီး စစ်ကောင်စီတပ်က တပ်စွဲထားကာ ရွာအနီးတဝိုက်ကိုလည်း နင်းမိုင်းတွေ ထောင်ထားတယ်လို့ ဆိုပါတယ်။

Yesagyo Revolution Group အဖွဲ့ တာဝန်ရှိသူတယောက်က  “ည ၈ ခွဲလောက်ဆို ညတိုင်း ဂွေးချိုဆည်ဘောင်ပေါ်ကို ကင်းလှည့်တယ်၊ ကင်းပုန်းစောင့်ကြတယ်။ သတင်းရလို့ မိုင်းနဲ့စောင့်ပြီး တိုက်ခိုက်ခဲ့တာပါဗျ။ ကင်းပုန်းဝပ်ဖို့လာတာ ခြောက်ယောက်ပါ။ နှစ်ယောက်က ပွဲချင်းပြီးသေတာ။ သေတာလည်း ပျူစောထီးတွေပါ။ သေသွားတဲ့ပျူနှစ်ကောင်လည်း ဒီတိုင်း တရွ​တ်တိုက်ကို ဆွဲသွားကြတာဗျ”လို့ ပြောပါတယ်။

စစ်ကောင်စီတပ်ဖွဲ့ဝင်တွေ မိုင်းဆွဲတိုက်ခိုက်ခံရပြီးနောက် ဂွေးချိုရွာကနေ လက်နက်ကြီးလေးချက် ရမ်းပစ်ခတ်ခဲ့တာကြောင့် ဆင်ချောင်းရွာနားက ဘုရားအနီးကျကာ ပျက်စီးသွားခဲ့ပြီး လူထိခိုက်မှုမရှိခဲ့ပါဘူး။

ရေစကြိုမြို့နယ်ထဲက ပြည်သူတွေအနေနဲ့ စစ်ကောင်စီတပ်တွေနဲ့ နီးနီးကပ်ကပ် မနေကြဖို့နဲ့ အချိန်မရွေး တိုက်ပွဲဖြစ်နိုင်တာကြောင့် အသွားအလာ ဆင်ခြင်ကြဖို့  ပြောက်ကျားတပ်ဖွဲ့က သတိပေးထားပါတယ်။

အဆိုပါ မိုင်းဆွဲတိုက်ခိုက်မှုကို Yesagyo Revolution Group-YRG၊ Shwe Nyar Myae (PDF)၊ KING COBRA People's Defense Force (PDF)၊ Urban Underground Revolution Force (UURF) အဖွဲ့တို့​ ပူးပေါင်းတိုက်ခိုက်ခဲ့တယ်လို့ သိရပါတယ်။