ရခိုင်ပြည်နယ်၊ မောင်တောခရိုင်အတွင်း လိုင်စင်မဲ့ကားတွေကို သြဂုတ် ၂၅ ရက် မနက်ကစပြီး မောင်တောမြို့ဝင်ဂိတ်နဲ့ ဘူးသီးတောင်မြို့ဝင်ဂိတ်တွေမှာ စစ်ဆေး ဖမ်းဆီးနေတယ်လို့ ခရိုင်ရဲတာဝန်ရှိသူတွေက ပြောပါတယ်။
“ဗျူဟာက ဦးစီးပြီး အဖွဲ့ပေါင်းစုံပူးပေါင်းပြီး စစ်ဆေးဖမ်းဆီးနေတာ။ အဓိကတော့ ဒေသလုံခြုံရေးအတွက်လို့ သိရတယ်။”
လိုင်စင်မဲ့ကားတွေကို နယ်မြေခံရဲတပ်ဖွဲ့၊ စစ်တပ်၊ ထွေ/အုပ်၊ ကညန၊ ပို့/ဆက်၊ ယာဥ်ထိန်းရဲ စတဲ့ အဖွဲ့ပေါင်းစုံပူးပေါင်းပြီး စစ်ဆေး ဖမ်းဆီးနေတာ ဖြစ်ပါတယ်။
ဖမ်းဆီးရမိတဲ့ လိုင်စင်မဲ့ကားတွေကို သွင်းကုန်/ထွက်ကုန် ဥပဒေပုဒ်မ ၈ အရ သက်ဆိုင်ရာ မြို့နယ်တရားရုံးတွေမှာ တိုက်ရိုက်အမှုဖွင့်လှစ်သွားမယ်လို့ ယာဥ်ထိန်းရဲတာဝန်ရှိသူတွေက ဆိုပါတယ်။
“ဖမ်းပြီး ချက်ချင်း တရားရုံးမှာ သွင်းကုန်/ထွက်ကုန် ဥပဒေပုဒ်မ ၈ နဲ့ တိုက်ရိုက်အမှုဖွင့်ပြီး အရေးယူသွားမှာ။”
မောင်တောခရိုင်မှာလိုင်စင်မဲ့ ကားကြီး ကားငယ် အစီး ၅၀၀ လောက်သာ ရှိကြောင်း မော်တော်ယာဥ်အသင်းရဲ့ စာရင်းတွေအရ သိရပါတယ်။
မောင်တောခရိုင်မှာ လိုင်စင်မဲ့ကားတွေကို သြဂုတ် ၂၅ ရက်ကနေ စက်တင်ဘာ ၇ ရက်အထိ စစ်ဆေးဖမ်းဆီးသွားမယ်လို့ ရဲတပ်ဖွဲ့ထံက သိရပါတယ်။
