မကွေးတိုင်း ပေါက်မြို့နယ် ပခုက္ကူ-မင်းတပ်ကားလမ်းမှာ သြဂုတ် ၁၃ ရက်မနက်ပိုင်းက ခရီးသွားပြည်သူ ၂ ယောက်ကို PDF တပ်ဖွဲဝင်၊ PDF ထောက်ပံ့သူလို့စွပ်စွဲပြီး စစ်တပ်က ဖမ်းဆီးသွားတယ်လို့ ဒေသခံတွေက ပြောပါတယ်။
ပေါက်မြို့အဝင် စစ်ဆေးရေးဂိတ်မှာ သြဂုတ် ၁၃ ရက် မနက် ၉ နာရီလောက်က မင်းတပ်မြို့၊ စံပြရပ်ကွက်နေ ခရီးသွားတယောက်ဖြစ်တဲ့ ကိုသီဟထွန်းကို စစ်တပ်နဲ့ အပေါင်းပါတွေက PDF ထောက်ပံ့သူဆိုပြီး စွပ်စွဲဖမ်းဆီးသွားကြတာလို့ ပေါက်မြို့ဒေသခံတယောက်က ပြောပါတယ်။
ဒ့ါအပြင် ပေါက်မြို့ သရက်တောဂိတ်မှာလည်း ဆောမြို့ကနေ ပေါက်မြို့ဘက်ကို ဆိုင်ကယ်နဲ့ ခရီးထွက်လာတဲ့ ဆောမြို့နယ်၊ တပြင်းရွာနေ ကိုဇော်မင်းဝင်းကိုလည်း PDF တပ်ဖွဲ့ဝင်လို့ စွပ်စွဲပြီး စစ်တပ်က ဖမ်းဆီးသွားကြတယ်လို့ သိရပါတယ်။
ဒေသခံက “သူတို့ ၂ ယောက်ကို ပေါက်ရဲခန်းက စစ်ကြောရေးပို့လိုက်တယ်။ သရက်တောဂိတ်ကတော့ အင်အားအများအပြားနဲ့ကို စစ်နေတာ အဆိုးဆုံးပဲ။ ယောကနေ ချင်းတောင်ပို့မယ့် ကုန်တွေကိုလည်း တားမြစ်ကန့်သတ်တဲ့ ဂိတ်တခုပဲ။ ငွေတောင်းလည်း ကြမ်းတယ်။ ငွေတောင်းလို့ အဆင်ပြေတဲ့ ကားတွေဆို အေးဆေး သွားလို့ရပေမဲ့ ခရီးသည်တင်ကားနဲ့ ကုန်ကားတွေဆို နည်းအမျိုးမျိုးနဲ့ ရစ်တော့တာပဲ” လို့ ပြောပါတယ်။
စစ်ကောင်စီက နိုင်ငံတော်အာဏာကို မတရားသိမ်းပိုက်တဲ့ ပြီးခဲ့တဲ့နှစ် ဖေဖော်ဝါရီ ၁ ရက်ကနေ အခုနှစ် သြဂုတ် ၁၂ ရက်အထိ နိုင်ငံတဝန်း ဖမ်းဆီးချုပ်နှောင်ခံရသူ ၁၂၀၀၀ ယောက်အနက် ၁၃၈၄ ယောက် ထောင်ဒဏ်ချမှတ်ခံထားရတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း AAPP က ထုတ်ပြန်ထားပါတယ်။