ဧရာဝတီတိုင်း၊ ဘိုကလေးမြို့မှာ မေလကနေ ဇွန်လအထိ ၁ လအတွင်း ညမထွက်ရအမိန့်ကြောင့် ဒေသခံ ပြည်သူ ၆၀ ကျော်ဖမ်းဆီးခံရတယ်လို့ ရဲတပ်ဖွဲ့အသိုင်းဝိုင်းက သိရပါတယ်။
စစ်ကောင်စီကထုတ်ထားတဲ့ ညမထွက်ရအမိန့်ကြောင့် ဖမ်းဆီးခံရတဲ့ ဒေသခံပြည်သူ ၆၀ ကျော်ထဲမှာ ကိုယ်ဝန်ဆောင်တယောက်လည်း ပါဝင်နေတယ်လို့ ရဲတပ်ဖွဲ့နဲ့နီးစပ်သူတဦးက ပြောပါတယ်။
“အမှန်ဆို ည ၁၀ နာရီက နည်းတယ်၊ ၁၂ နာရီလောက်ဆိုတော်သေးတယ်။ တချို့ အလုပ်လုပ်ပြီး ပြန်လာလို့ အဖမ်းခံရတာတွေလည်းရှိတယ်။ ပိုက်ဆံမပေးနိုင်တဲ့သူ ထောင်ကျတာပဲ”လို့ ပြောပါတယ်။
ညမထွက်ရအမိန့်ကျော်လွန်ပြီး ဖမ်းဆီးခံရတဲ့ ပြည်သူ ၆၀ ကျော်ထဲမှာ ပိုက်ဆံပေးနိုင်တဲ့သူတွေကို စစ်ကောင်စီက ပြန်လွှတ်ပေးခဲ့တာကြောင့် ၇ ယောက်သာ ထောင်ကျခဲ့ပြီး အဲ့အထဲမှာ ကိုယ်ဝန်ဆောင်သည်တဦးပါ ပါဝင်နေတယ် လို့ဆိုပါတယ်။
စစ်ကောင်စီက ထုတ်ပြန်ထားတဲ့ ညမထွက်ရအမိန့်ကို ကျော်လွန်လို့ ဖမ်းဆီးခံရတဲ့သူတွေထဲက ၇ ယောက်ကို ပုဒ်မ ၁၈၈ နဲ့ တရားစွဲဆိုပြီး ထောင်ဒဏ် ၃ လစီပြစ်ဒဏ်ချမှတ်ခဲ့တာလို့ တရားရုံးအသိုင်းအဝိုင်းက သိရပါတယ်။
ညမထွက်ရအမိန့် ကျော်လွန်လို့ ဖမ်းဆီးခံရတဲ့ ဒေသခံပြည်သူတွေထဲမှာ ၇ ဦးသာ ထောင်ကျပြီး ကျန်တဲ့ ၂၁ ဦးကတော့ တရားရင်ဆိုင်နေရဆဲဖြစ်ပါတယ်။
စစ်အာဏာသိမ်းပြီးနောက်ပိုင်း ရန်ကုန်၊ မန္တလေး၊ နေပြည်တော် မြို့ကြီးတွေအပါဝင် နိုင်ငံတဝန်းမှာ ညမထွက်ရအမိန့်တွေကို ဒေသအလိုက် ထုတ်ပြန်ထားတာဖြစ်ပြီး ဘိုကလေးမြို့မှာတော့ ည ၁၀ နာရီကနေ မနက် ၄ နာရီအထိ သတ်မှတ်ထားပါတယ်။