ရက္ခိုင့်တပ်တော်(အေအေ)ဘက်ကို စစ်ကောင်စီ တပ်သား ရာချီထွက်ပြေးခိုလှုံလာတယ်လို့ ဇွန် ၁၄ ရက် ဒီနေ့မနက် အွန်လိုင်းကနေပြုလုပ်တဲ့ သတင်းစာရှင်းလင်းပွဲမှာ အေအေပြောရေးဆိုခွင့်ရှိသူ ခိုင်သုခက ပြောပါတယ်။
ထွက်ပြေးလာတဲ့ စစ်သားတွေကို အတတ်နိုင်ဆုံး လူသားချင်းစာနာထောက်ထားမှုနဲ့ ကူညီပေးထားတယ်လို့ သတင်းထောက်တစ်ယောက်ရဲ့ မေးမြန်းမှုကို အေအေပြောရေးဆိုခွင့်ရှိသူ ခိုင်သုခက ပြောကြားခဲ့ပါတယ်။
“ကျနော်တို့ဆီကို အေအေဘက်ကိုထွက်ပြေးလာတဲ့ စစ်ကောင်စီတပ်သား ရာနဲ့ချီပြီး ရှိပါတယ်။ အဲ့ဒီလူတွေကို ကျနော်တို့ တတ်နိုင်သမျှ လူသားချင်စာနာထောက်ထားမှု အပြည့်နဲ့ ကူညီပေးနေတာတွေရှိပါတယ်။ လူအရေအတွက် အတိအကျကိုတော့ပြောသွားဖို့မရှိဘူး။ ဒါပေမဲ့ အဲဒီလို ထွက်ပြေးလာတဲ့လူတွေကို ကျနော်တို့ဆီကိုရောက်လာပြီဆိုရင် ကျနော်တို့ဘက်က အတတ်နိုင်ဆုံး အကောင်းဆုံး ကူညီတာတွေ နေရာချထားပေးတာတွေ လုပ်ဆောင်နေတယ်။”
၂၀၂၂ ခုနှစ်အတွင်း ရခိုင်ပြည်နယ်နဲ့ ချင်းပြည်နယ် ပလက်ဝမြို့နယ်အတွင်းမှာ ရက္ခိုင့်တပ်တော်(အေအေ)နဲ့ စစ်ကောင်စီတပ်တွေ အကြားတိုက်ပွဲ ထိတွေ့မှု လေးကြိမ်အထိ ရှိခဲ့ပါတယ်။
ရခိုင်ပြည်နယ်ကို ရောက်ရှိနေတဲ့ စစ်ကောင်စီ ဒုဥက္ကဋ္ဌဗိုလ်ချုပ်မှူးကြီးစိုးဝင်းက ဇွန်လ ၁၃ ရက်မှာ စစ်တွေနဲ့ ဘူးသီးတောင်တပ်နယ်တွေကိုသွားရောက်ပြီး စစ်ကောင်စီမိသားစုဝင်တွေနဲ့ တွေဆုံခဲ့ကာ တပ်တွင်းစည်းရုံးရေးဆင်းခဲ့တယ်လို့ သိရပါတယ်။