စစ်ကိုင်းတိုင်း ကနီမြို့နယ်ထဲက ရွာ ၂ ရွာကို စစ်ကောင်စီတပ်တွေ ဝင်ရောက်ပြီး မီးရှို့သလို ရွာသားတွေကို ပစ်သတ်ခဲ့တယ်လို့ ဒေသခံတွေက ပြောပါတယ်။
မနေ့က ချင်းတွင်းမြစ်အတိုင်း ဆန်တက်လာတဲ့ စစ်ကောင်စီတပ်တွေဟာ မုတ်ထောရွာကိုဝင်ပြီး သေနတ်နဲ့ လိုက်လံပစ်ခတ်ခဲ့တယ်လို့ ဒေသခံတယောက်က ပြောပါတယ်။
“ဖလပ်(ကားတွေကိုပါတင်နိုင်တဲ့ ဇက်သင်္ဘော)အကြီး ၉ စီးနဲ့ ဆန်တက်လာတယ်။ မုတ်ထောရွာကို ဝင်ပြီး ရွာထဲက အိမ်တွေကို မီးရှို့တယ်။ လူတွေကို လိုက်ပစ်တယ်။ လူတွေသေတယ်။ ဒါပေမဲ့ အသေအပျောက်စာရင်းကို မသိရသေးဘူး။ သူတို့က အဲရွာမှာပဲ ညအိပ်တယ်။ ဒီမနက်တော့ တဖက်ကမ်းက နတ်ကြီးရွာကို ဝင်ပြီး မီးရှို့တယ်။ လူတွေက ရှောင်နေကြတော့ အသေအပျောက်မရှိဘူး။”
စစ်ကောင်စီတပ်တွေ မီးရှို့လို့ အိမ်ခြေ ၂၀ လောက် မီးလောင်ပျက်စီးခဲ့ပြီး စစ်ကောင်စီ တပ်သားတွေကတော့ တဖက်ကမ်း မုတ်ထောရွာကို ပြန်သွားပြီးနောက် အထက်ဘက်ကို ဆက်လက် ဆန်တက်သွားပြီလို့လည်း သိရပါတယ်။
ဒေသခံပြည်သူ့ကာကွယ်ရေးတပ်သားတယောက်ကလည်း “မနေ့ညက မုတ်ထောကို မီးရှို့တော့ ကျနော်တို့က ဒီဘက်ကမ်းကနေ ကူပစ်ပေးတယ်။ ရွာကလူတွေကိုတော့ ရှောင်ခိုင်းထားတာပေါ့။ ဒီမနက်လည်း နတ်ကြီးရွာကို မီးရှို့တော့ ကျနော်တို့ တိုက်ဖို့သွားကြတယ်။ ဒါပေမဲ့ လက်နက်အင်အားမမျှလို့ မနက် ၈ နာရီကပဲ ပြန်ဆုတ်လာရတာပါ” လို့ ပြောပါတယ်။
