စစ်အာဏာသိမ်း ၁ နှစ်ပြည့် အသံတိတ်သပိတ်ဖြင့် ဆန္ဒပြမည်

စစ်အာဏာသိမ်းမှု တစ်နှစ်ပြည့်မြောက်တဲ့ ဖေဖော်ဝါရီ ၁ ရက်နေ့မှာ တနိုင်ငံလုံးအနှံ့ အသံတိတ်သပိတ် ပြုလုပ်ဖို့ လှုံ့ဆော်လှုပ်ရှားမှုတွေ ရှိနေပါတယ်။  

“ပြည်တော်ဝင်ဖို့ ရုန်းကြစို့” လို့အမည်ပေးထားပြီး ပြည်သူတွေရဲ့ အကျယ်လောင်ဆုံးအသံကို ကြားစေဖို့အတွက် ဖေဖော်ဝါရီ ၁ ရက် မနက် ၁၀ နာရီကနေ ညနေ ၄ နာရီအထိ အသံတိတ်သပိတ်ကိုပြုလုပ်ဖို့ နှိုးဆော်ထားပါတယ်။ 

အသံတိတ်သပိတ် ပြုလုပ်တဲ့နေ့မှာ အိမ်ထဲမှာပဲနေရင်းနဲ့ စစ်အာဏာသိမ်းမှုကာလအတွင်း ကျဆုံးသွားတဲ့သူတွေ၊ ဖမ်းဆီးခံရပြီး အကျဉ်းထောင်ထဲရောက်နေတဲ့သူတွေအတွက် ကောင်းမှုကုသိုလ်ပြုလုပ်တာတွေ လုပ်ဆောင်ဖို့ တိုက်တွန်းထားသလို တော်လှန်ရေးအတွက် PDF တွေ ရန်ပုံငွေများများရအောင် Click များများလုပ်ကြဖို့လည်း နှိုးဆော်ထားပါတယ်။ 

သပိတ်ပြီးဆုံးတဲ့အချိန် ညနေ ၄ နာရီတိတိမှာတော့ လက်ခုပ်သံတီး ဂုဏ်ပြုကြဖို့လည်း ကမ်ပိန်းဦးဆောင်သူတွေက ပြောဆိုထားပါတယ်။ 

စစ်အာဏာသိမ်းမှု တစ်နှစ်အတွင်း ဇန်နဝါရီ ၂၁ ရက်အထိ တစ်နိုင်ငံလုံးအတိုင်းအတာနဲ့ ၁၅၀၀ နီးပါး ကျဆုံးခဲ့ပြီး လူပေါင်းတစ်သောင်းကျော် ဖမ်းဆီးခံနေရကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း-မြန်မာနိုင်ငံ  (AAPP)  က ထုတ်ပြန်ထားပါတယ်။

//
More News
Up