ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေမှာ ဇန်နဝါရီ ၁ ရက်မှ ၁၅ ရက်အတွင်း စစ်ကောင်စီတပ်နဲ့ KNLA ၊ KNDO တို့ ပစ်ခတ်တိုက်ခိုက်မှု စုစုပေါင်း ၁၈၁ ကြိမ်ဖြစ်ပွားခဲ့ပြီး စစ်ကောင်စီတပ်ဖွဲ့ဝင် ၁၅၉ ယောက်သေဆုံး၊ ၁၀၂ ယောက် ဒဏ်ရာရတယ်လို့ ကေအန်ယူက ဇန်နဝါရီ ၁၉ ရက်မှာ ထုတ်ပြန်ပါတယ်။
တိုက်ပွဲတွေအတွင်း KNLA နဲ့ KNDO ဘက်က ၁၃ ယောက်ကျဆုံး၊ ၁၈ ယောက် ဒဏ်ရာရရှိခဲ့သလို ဒေသခံပြည်သူ ၇ ယောက်သေဆုံးခဲ့ကာ ၁၉ ယောက်ဒဏ်ရာရခဲ့တယ်လို့လည်း ထုတ်ပြန်ထားပါတယ်။
ဒါ့အပြင် ကော်သူးလေနယ်မြေအတွင်းကို စစ်ကောင်စီတပ်က လက်နက်ကြီးနဲ့ ပစ်ခတ်မှုပေါင်းအကြိမ်း ၂၀၀ ကျော်နဲ့ လေယာဉ်နဲ့ ဗုံးကြဲတိုက်ခိုက်မှု ၇ ကြိမ်ပြုလုပ်ခဲ့တယ်လိုလည်း အဆိုပါထုတ်ပြန်ချက်မှာ ဖော်ပြထားပါတယ်။
အခုလို တိုက်ပွဲတွေကြောင့် ကော်သူးလေနယ်မြေမှာ နေထိုင်တဲ့ ပြည်သူပေါင်း ၁ သိန်းကျော် စစ်ဘေးဒုက္ခခံစားနေရပြီး ၅ သောင်းကျော်က စစ်ဘေးရှောင်နေကြရပါတယ်။